Sua Tutŋana 7:14-23

¹⁴“Ai, nio ti, muŋgu aŋbuk sua pa Anutu be aŋkam patoronŋana pini. Mi koozi aŋkam patoronŋana tana, mi buzur ka lwoono imbotmbot ruumu tio be takan.

¹⁵Tana aŋyooto pa ruumu ma aŋmar be aŋru u tau. Mi iŋgi aŋdeeŋu kek.

¹⁶Leŋ. Nio aŋurpe mbalia tio, mi aŋwar mburu ta kan mos ambaimbaiŋan na ise muriŋ. Mburu tana imbot taa Aikuptu mi imar.

¹⁷Mi aŋliŋ koroŋ pakan ta kuzin ambaimbaiŋan na ise ma ambai leen!

¹⁸Tana mar ma ituru tekeene. Ko menmeen ti mi takamam ma ila irao zoŋ ise!

¹⁹Kam ŋgar pa kusiŋ pepe. Pa ni imbotmbot ruumu som. Iŋga ila pa lele molo. Ko loŋa imar na zeen.

²⁰Pa ila raama kautu kini ta bok pa pat. Tana ko imbotmbot ma puulu ilupi, tona imar.”

²¹Moori tana ikam mbulu boozo pa naŋgaŋ tana bekena iyaaru i. Mi kwoono imbesmbeeze pini ma tau! Tabe ikam leleene, mi ni ito i ma ziru tila.

²²Naŋgaŋ tana inamnaama som. Ziru tila pataaŋa. Ni kembei makau ta iur niini mi tikami ma tila be tipuni ma imeete. Mi kembei buzur ta ikilaala kilis som mi kumbuunu isula.

²³Ni ikilaala som. Mbulu ta ikam na, ko ikami ma imeete. Kaimer peene lutuunu sa ko iŋgetŋgeete ise kuliini. Ni ko iwe kembei ŋge ta ila ma kilis ikami.