Sua Tutŋana 5:4-22

⁴Mi nu sombe la ki moori sa ta kembei, na kaimer mbotŋana ku ko isaana ma ipakpak kat. Ko kembei ta buza mata mbaaru iŋgalu.

⁵Nu sombe to zaala kini, nako meete ma la lem. Pa ni ko iyaaru ma sula lem naala.

⁶Zaala ki mbotŋana mata yaryaaraŋana na, ni ikamam ŋgar pa ri sa som kat. Zaala ta ni itoto, ina ipa ndel pa zaala ndeeŋeŋana. Tamen ni ikilaala som.

⁷Tana lutuŋŋan, keleŋ la kalŋoŋ. Kipizil ndemeyom pa sua tio ti pepe.

⁸Moori ta kembei na, kagarau i pepe. Kombotmbot molo pini.

⁹Kokena ipasaana zoyom, mi koroŋ tiom ta ndaama ndaama mi kembelmbel uraata pa na, imap pini sorok. Mi koroŋ toro tomini. Sombe kusiini ileŋ, nako iseeze kat motoyom. Irao imuŋai yom ri sa na som. Som kat!

¹⁰Tana koroŋ tiom ambaimbaiŋan ta uze tiom tiene na, ko iwe wal pakan len, be tikanan ma tiwinin.

¹¹Mi niom ko kusu ma kewe koroŋ sorok, mi mete ikam yom ma mburoyom imap mi saana kat. Mi sombe swoyom igarau, to ko ketwer ma koso ta kembei:

¹²“O yae, muŋgu wal pakan titut yo. Mi parei ta aŋleŋ la kalŋan som? Indeeŋe ta titoombo be tipazal yo na, aŋrepilpiili sua kizin.

¹³Mi titoombo be tipaute yo na, aŋgun talŋoŋ pizin som, mi aŋto sua kizin som.

¹⁴Tana iŋgi mbotŋana tio isaana kat, mi koŋ miaŋ biibi ila iwal matan.”

¹⁵O lutuŋ, niomru kusim men kaparlup yom mi menmeen yom pa mbulu ki ula. Pa ina kembei nu winin yok ta itum touŋom na.

¹⁶Parei ta nu lelem be la kizin moori pakan ma niomŋan kekeene? Pa ina kembei nu kam yok ta ireere pa yok ku lepeene na, mi liŋ sorok su zaala lwoono, som kar keteene.

¹⁷Ula ka mbulu, ina koroŋ ki niomru kusim men be menmeen yom pa. Tana niomŋan moori pakan kakam pepe.

¹⁸Bela nu menmeenu pa kusim ta nu naŋgaŋŋom mi wooli na. Naso kampeŋana ki Anutu imbotmbot se ula tiom, mi waem ko ikamu ma lelem ambai kat.

¹⁹Pa ni ko iurur kat leleene pu, mi nu re ruŋguunu mi koroŋŋanŋan ta boozomen na, ambai men pa motom. Zuzuunu ko ikamu ma so tekteege lem. Tana ni ko ikam kat lelem, mi ŋgar ku imap ma ilala kini.

²⁰O lutuŋ, kokena moori toro ikam lelem ma zem ula ku. Re: Nu sombe teege tomooto toro kusiini zuzuunu, ko ambai? Som.

²¹Pa mbulu boozomen ta iti tomtom takamam na, imbot kat mat pa Yooba mataana. Ni itirtiiri iti pa mbulu kiti ta boozomen.

²²Mbulu sananŋana kizin wal sananŋan ta ikaukau zin. Mbulu kizin ta irao pa Yooba mataana som na, ina iwe kembei wooro be tipo zin pa.