Sua Tutŋana 4:5-13

⁵Kam kinkiini be kam lem ŋgar ambaiŋana mi kilaala ŋgar iŋgoi ta ambai ma ilip. Mi motom mbelele sua tio pepe, mi paŋoobo pa pepe.

⁶Pizil ndemem pa ŋgar ambaiŋana pepe.

⁷Kam kinkiini pa ŋgar ambaiŋana. Pa ina ilip pa koroŋ ta boozomen. Tana ru zaala be kam lem ŋgar ambaiŋana. Sombe zem koroŋ ku ta boozomen ma ila bekena kam lem ŋgar ambaiŋana, na ila lak! Nin pepe.

⁸Nu sombe pakur ŋgar ambaiŋana, nako ŋgar ambaiŋana ipakuru tomini. Mi sombe yogeege lem ŋgar ambaimbaiŋan matakiŋa, nako ikam ma zom iwe biibi.

⁹Ŋgar ambaiŋana ko iwe kembei mogar ndabokŋana kat tau imbot la ndomom mi iwe aigau pu.

¹⁰O lutuŋ, leŋ sua tio ti mi kan la. Naso mbotmbot su toono ma molo, mi kom ndaama boozo.

¹¹Nio iŋgi aŋpaute u pa zaala ki ŋgar ambaiŋana. Aŋmuŋmuuŋgu pu, mi aŋzzo u pa zaala ndeeŋeŋana.

¹²Zaala tana, ambaiŋana. Sombe pa pa, na koroŋ sa ko irao iŋgal kumbum na som. Mi sombe loondo pa, na kumbum ko irao ikam giris ma mel na som.

¹³Sua tutŋana ta aŋkam pu na, zem pepe. Motom iŋgalŋgal mi kiskis la lelem. Pa ina ko ikamu ma mbot ambai.