Sua Tutŋana 3:3-14

³Mbulu ki tu'urur lelende pa Anutu mi zin tomtom mi tototo sua kiti mbukŋana na, zem pepe. Mbulu ru tana, kiskis la lelem mi zzwe totomen. Pa ina ko iwe kembei aigau ta imbot la ketem na.

⁴Tana kiskis mbulu ru tana. Naso ndeeŋe kampeŋana biibi, mi Anutu ziŋan zin tomtom tire u kembei nu lem ŋgar ambaiŋana.

⁵Re: Kokena pase pa itum ŋgar ku. Ur lelem imap ila ki Yooba, mi pase pini men.

⁶Mi so zaala i ta lelem iur pa be to, na kam ŋgar pa Yooba muŋgu, mana kam. Naso ni ikam peeze piwi mi iso u pa ka zaala.

⁷Re itum kembei nu rao kat pa ŋgar pepe. Moto Yooba, leŋleŋ la kalŋaana, mi pizil ndemem pa mbulu sananŋan ta boozomen.

⁸Pa mbulu ta kembei ko iuulu kulim ma imbot ambai, mi ikam ma kulim iŋgeeze mi nim se pa uraata.

⁹Yooba, ni ikam lem koroŋ boozo kek. Tana pimilmiili koroŋ pakan ma ilala kini bekena pakuri pa. Koroŋ ku paazaŋan ta boozomen na, motom iŋgal be pazas mataana kana ma ilala kini.

¹⁰Naso Anutu ikam ma mokleene ku ipiyooto kini boozo, mi diditu ku bokbok men. Mi baen ku ko ipiyotyooto ŋonon ta sorok som, mi baen piiziŋana muriini bokbok kat pa yok baen popoŋana.

¹¹Lutuŋ, sombe Yooba ikam mbulu sa pu bekena ipazalu pa, na parsiki pepe. Mi sombe iyaambu, na lelem iŋgis pa pepe.

¹²Pa zin wal ta Yooba leleene pizin na, ni ipazalzal zin, kembei ta takamam pa lutundu bizin tau lelende pizin ilip na.

¹³Tomtom ta so iru ŋgar ambaiŋana ma indeeŋe, mi ikilaala ŋgar iŋgoi ta ambai ma ilip, nako leleene ambai kat, mi kampeŋana ki Anutu imbotmbot se kini.

¹⁴Pa ŋgar ambaiŋana ipiyotyooto ŋonoono ambaimbaiŋan boozomen piti. Ilip pa silba ma gol.