Sua Tutŋana 3:11-24

¹¹Lutuŋ, sombe Yooba ikam mbulu sa pu bekena ipazalu pa, na parsiki pepe. Mi sombe iyaambu, na lelem iŋgis pa pepe.

¹²Pa zin wal ta Yooba leleene pizin na, ni ipazalzal zin, kembei ta takamam pa lutundu bizin tau lelende pizin ilip na.

¹³Tomtom ta so iru ŋgar ambaiŋana ma indeeŋe, mi ikilaala ŋgar iŋgoi ta ambai ma ilip, nako leleene ambai kat, mi kampeŋana ki Anutu imbotmbot se kini.

¹⁴Pa ŋgar ambaiŋana ipiyotyooto ŋonoono ambaimbaiŋan boozomen piti. Ilip pa silba ma gol.

¹⁵Mi ilip pa pat milmilŋan pakan ta ndabokbokŋan kat. Tana koroŋ boozomen ta nu lelem pa i na, sa irao kembei ŋgar ambaiŋana na som.

¹⁶Ŋgar ambaiŋana namaana ru iteege koroŋ boozomen be ikam piti. Namaana woono irao iseeŋge swondo ma molo. Mi namaana ŋas na, irao ikam lende koroŋ boozo, mi ikam ma zanda iwe biibi.

¹⁷Zin wal ta so titoto zaala ki ŋgar ambaiŋana, nako tiyamaana ambai. Pa mboti kizin ko ndabok kat.

¹⁸Ŋgar ambaiŋana, ina iwe kembei ke ki mbotŋana mata yaryaaraŋana. Pa zin wal ta so tikami ma iwe len mi tikiskisi, nako timbot ambai, mi kampeŋana ki Anutu imbotmbot se kizin.

¹⁹Muŋgu kat Yooba ito ŋgar kini ambaiŋana, mi iur toono uunu ma imbol. Mi ikam kat ŋgar, mana iur saamba.

²⁰Muŋgu kat yok ta imbot meleebe na, ise raama mburaana biibi. Ito ni ŋgar kini. Mi ŋgar kini, ta izzo i pa mbulu tabe ikam ma yaŋ izzu pa gubur tiene, mi tolou iwedet.

²¹Lutuŋ, motom iŋgal be kiskis ŋgar ambaiŋana. Ŋgar ta iurur ŋonoono na, zem pepe.

²²Pa ina ko ikamu ma mbot ambai, mi ipeŋgeeze mbulu ku, kembei aigau ta imbot la ketem na.

²³To pa pai ku ma ambai men. Pa kosasa ko ipasaanu som, mi irao tutkat kumbum na som.

²⁴Mi sombe su murim be keene, nako moto som. Ko keene kat lem.