Sua Tutŋana 31:1-10

¹Iŋgi sua ki King Lemuel. Ŋgar taiŋgi, Anutu iswe la ki Lemuel naana, mi naana kadoono ikam la kini.

²O lutuŋ, nom ŋonoono ta nio i. Indeeŋe ta nu mbotmbot men lela kopoŋ leleene na, aŋbuk sua pa Anutu be aŋuru ma we ni lene. Tana kozo ŋgun talŋom pa sua tio ti.

³Re: Kokena pasaana koroŋ ku pizin moori mi zem mburom pizin. Pa ina zaala ta ipasansaana king boozomen ma tizanzaana pa i.

⁴O Lemuel, motom iŋgal. Zin wal ta tikamam peeze na, yok mbolŋana irao ipasiksik ŋguren na pepe.

⁵Kokena tiwin, to matan mbeleele tutu ta imbot pataaŋa kek na, mi tiurpe kat pataŋana kizin wal sorrokŋan som.

⁶Yok mbolŋana mi baen, ina king koroŋ kizin som. Ina koroŋ kizin wal ta tikamam be timeete i, mi zin wal ta lelen ipata kat ma timbotmbot.

⁷Pa zin wal ta len koroŋ som ma timbot ŋoobo, mi zin wal ta lelen ipata kat na, tiwinin bekena matan mbeleele pataŋana kizin.

⁸Zin wal ta tirao be tiporoukaala zitun som na, sombe tomtom tikam ŋoobo zin, na nu maane pepe. Maŋga mi so sua bekena uulu zin. Zin wal ta timbotmbot raama pataŋana na, mender pizin mi urpe pataŋana kizin ma indeeŋe men.

⁹Tana sombe tomtom timbotmbot raama pataŋana mi tiru zalan na, nu maane pepe. Maŋga mi so sua bekena uulu zin. Mender pizin, mi urpe pataŋana kizin ma indeeŋe men.

¹⁰Sombe tomooto sa leleene be iwoolo, mi indeeŋe moori ŋonoono ta ikamam kat mbulu, na ni ikam le koroŋ ambaiŋana kat. Zin moori ta kembei tilip pa pat milmilŋan ta kan kadon bibip i. Tamen zin boozo som. Ko tendeeŋe zin la ki parei?