Sua Tutŋana 30:9-18

⁹Pa sombe leŋ koroŋ boozo mete, nako aŋpizil ndemeŋ pu mi aŋrepiilu ma aŋso: “Yooba, ni asiŋ?” Mi sombe leŋ koroŋ som mi aŋbot ŋoobo, nako aŋkam kuumbu mi aŋpamiaŋ Anutu tio zaana.

¹⁰La ki biibi sa ma ŋgal sorok sua pa mbesooŋo kini pepe. Kokena mbesooŋo tana ileŋ, to isuŋ Anutu be ipasaanu. Pa nu uunu ku.

¹¹Tomtom pakan, zin tizuŋzuŋ Anutu be ikampe nan bizin som, mi tigibgiibi sua sananŋan boozomen pa taman bizin.

¹²Mi wal pakan na, tire zitun kembei mbulu kizin iŋgeeze men. Tamen mbulu kizin pakan ta tikamam ki keŋana na, sananŋana kat. Iŋgeeze som.

¹³Mi tomtom pakan na, tipakurkur zitun, mi matan pasom waen bizin pakan ma tau!

¹⁴Mi wal pakan na, kwon kembei ta buza. Sua kizin ipasansaana kat zin wal sorrokŋan ta timbotmbot raama pataŋana na, Pa tisombe tipambiriizi zin ma timap kat pa toono.

¹⁵Wal pakan, zin kembei ta ndeeme i. Pa gorgori tizzo ta kembei: “Kam leŋ koroŋ. Kam koŋ koroŋ.” Koroŋ paŋ, ta gorgori tizzo ta kembei: “Iŋgi amkam irao zeen.”

¹⁶Koroŋ ta kembei: Meeteŋana, zin moori ta kopon somŋan, toono ta ka yok somŋana mi ikerekere na, mi you.

¹⁷Tomtom ta so mata pasom tamaana, mi irepilpiili naana mi izorzooro la kalŋaana, na meeteŋana kini ko ambai som kat, mi irao titwi i na som. Putuunu ko imbot mat mi man aŋkor timar ma tipai mata kutuluunu mi tikan!

¹⁸Mbulu tel ta tipa ndel kat. Aŋkam ŋgar pa ma aŋrao som. Mbulu ki manboŋ ta irie pa maŋaanaŋana na, mbulu ki mooto ta iwwa se pat na, mi mbulu ki wooŋgo ta ikowo pa tai na. Mi toro ta iwe paŋ pa na, ina mbulu tau zin naŋgaŋ ma tamuriŋriŋ tikamam. Aŋkam ŋgar pa ma aŋrao som kat.