Sua Tutŋana 29:9-25

⁹Tomtom ta le ŋgar ambaiŋana na, isombe ipamender tomtom kankaanaŋana sa pa sua, nako tomtom kankaanaŋana tana kalŋaana izalla mi ikam sua repiiliŋana boozo pini. Irao iur niini na som.

¹⁰Zin wal ta tipa pai kizin ma ambai men na, wal ta tikamam zaaba pizin tomtom tiurur koi pizin. Mi wal ndeeŋeŋan na, tikamam kinkiini be tiuulu zin ma timbot ambai.

¹¹Wal kankaanaŋan ta tizorzooro na, tirao be tiyaraama keten malmalŋana kizin som. Tizzwe ma imbot mat. Mi tomtom ta le ŋgar ambaiŋana na, ni iyaramraama itunu.

¹²Tomtom peeze kana sa isombe ileŋleŋ la sua pakaamŋana, na wal uraata kan kini ko timap ma tiwe wal sananŋan.

¹³Wal sorrokŋan mi zin bibip ta tiseseeze tomtom matan na, zin raraate som. Mi koroŋ tamen ta ilup zin: Yooba ipayaryaara zin mi ikiskis zin, ta timbot matan yaryaara.

¹⁴King ta so iurpewe pataŋana kizin wal sorrokŋan ma indeŋdeeŋe men, na peeze kini ko imbol ma imbotmbot.

¹⁵Sombe tabalis zin tomtom mi tapazal zin, nako tikam len ŋgar ambaiŋana. Mi sombe tezem pikin sa ma inoknok mbulu sananŋana, na kaimer ni ko ipamiaŋ naana.

¹⁶Sombe wal sananŋan timasak ma tiwe boozo, na mbulu sananŋana ko ipet ma iwe biibi. Tamen kaimer wal ndeeŋeŋan ko tire kat ki matan ta kembei: Wal sananŋan ko tisu ma mburan imap.

¹⁷Pazal lutum. Naso lelem ipata som mi mbotmbot raama menmeenu. Pa ni ko ikamu ma lelem ndabok kat.

¹⁸Sombe Anutu kwoono bizin tizzwe sua kini som, nako tomtom timaŋga mi tikam mbulu bozboozo. Pa koroŋ sa be iyaraama zin mini som. Mi tomtom ta so mataana iŋgalŋgal tutu ki Anutu mi itoto, nako leleene ambai mi kampeŋana ki Anutu imbotmbot se kini.

¹⁹Nu sombe so sua men pa mbesooŋo ku, nako rao urpe mbulu kini na som. Ŋonoono, sua ni ileŋleŋ. Mi ko irao ikan la na som. Bela nu balisi, tona ileŋ la kalŋom.

²⁰Wal kankaanaŋan ta tizorzooro na, ipata pizin be titooro mbulu kizin. Mi tomtom ta so ikam kat ŋgar som, mi iwirri sorok sua, nako ipata kat pini be itooro mbulu kini.

²¹Sombe mbesooŋo ku naŋgaŋŋana mi kwom ikanani pa uraata som, na kaimer ni ko irao ikam kat uraata som, mi ikam pataŋana pu.

²²Tomtom ta so keteene bayouŋana, nako ipeyei ŋoŋi boozo, mi itunu ikamam sanaana boozo.

²³Mbulu ki tapakurkur itundu ko ikam ti ma kanda miaŋ. Mi sombe tomtom sa ikototo itunu mi imbesmbeeze pizin tomtom, ina zaala tabe zaana iwe biibi.

²⁴Nu sombe gaaba tomtom toro pa mbulu ki kuumbu, na ur itum ila pataŋana. Pa kaimer, sombe tipamenderu, mi tiso pu be so kat sua ŋonoono ila Anutu mataana, nako kam so? Pa sombe swe mbulu ku tana, nako tiur kadoono pu. Mi sombe watkaala, nako Anutu itunu keteene malmal pu mi ipasaanu.

²⁵Mbulu ki tomototo zin tomtom ko iwe kilis piti. Mi tomtom ta so ipase pa Yooba, na Yooba ko mataana pini mi imboro i ma imbot ambai. Irao koroŋ sa ipasaani na som.