Sua Tutŋana 29:1-16

¹Tomtom ta so imbelmbel sua pazalŋana leŋŋana, mi tamen inoknok men zooroŋana, nako lwoono sa to pataŋana biibi ipasaani. To zaala sa be imbot ambai mini na som.

²Sombe wal ndeeŋeŋan timasak ma tiwe boozo, to tomtom menmeen zin mi lelen ambai kat. Mi sombe wal sananŋan tikamam peeze, na tomtom lelen ipata mi tikaraŋesŋeeze.

³Pikin sa, sombe leleene ilip be ikam le ŋgar ambaiŋana, nako ikam ma tamaana leleene ambai kat. Mi pikin ta so igabgaaba zin moori zaala lwoono kan, nako ipasaana koroŋ ki tamaana.

⁴King ta so ikamam mbulu ndeeŋeŋana men, nako ipombol zin tomtom be tikam mbulu ambaiŋana, mi lele kini imbot ambai. Mi king ta so mata koroŋŋana mi isombe tomtom tiŋgiimi i, tona iuulu zin, nako ikam ma lele kini isaana.

⁵Tomtom ta so kwoono imbesmbeeze pa waene toro, na iurpewe kilis pini be ikeeni.

⁶Zooroŋana kizin wal sananŋan ko iwe kilis pizin mi ipasaana zin. Mi wal ndeeŋeŋan na, zin lelen ambai men mi tilonloondo ma tila pa zaala ambaiŋana.

⁷Wal ndeeŋeŋan tikamam ŋgar biibi pizin wal sorrokŋan, mi lelen be tikam ŋoobo zin som. Mi wal sananŋan na, tikamam ŋgar pa koroŋ ta kembei som.

⁸Zin wal ta tipakurkur zitun mi tirepilpiili ŋgar ambaiŋana na, tipesese zin tomtom be tipasaana kar. Mi zin wal ta len ŋgar ambaiŋana na, tipalumluumu tomtom lelen bekena keten malmalŋana kizin imap.

⁹Tomtom ta le ŋgar ambaiŋana na, isombe ipamender tomtom kankaanaŋana sa pa sua, nako tomtom kankaanaŋana tana kalŋaana izalla mi ikam sua repiiliŋana boozo pini. Irao iur niini na som.

¹⁰Zin wal ta tipa pai kizin ma ambai men na, wal ta tikamam zaaba pizin tomtom tiurur koi pizin. Mi wal ndeeŋeŋan na, tikamam kinkiini be tiuulu zin ma timbot ambai.

¹¹Wal kankaanaŋan ta tizorzooro na, tirao be tiyaraama keten malmalŋana kizin som. Tizzwe ma imbot mat. Mi tomtom ta le ŋgar ambaiŋana na, ni iyaramraama itunu.

¹²Tomtom peeze kana sa isombe ileŋleŋ la sua pakaamŋana, na wal uraata kan kini ko timap ma tiwe wal sananŋan.

¹³Wal sorrokŋan mi zin bibip ta tiseseeze tomtom matan na, zin raraate som. Mi koroŋ tamen ta ilup zin: Yooba ipayaryaara zin mi ikiskis zin, ta timbot matan yaryaara.

¹⁴King ta so iurpewe pataŋana kizin wal sorrokŋan ma indeŋdeeŋe men, na peeze kini ko imbol ma imbotmbot.

¹⁵Sombe tabalis zin tomtom mi tapazal zin, nako tikam len ŋgar ambaiŋana. Mi sombe tezem pikin sa ma inoknok mbulu sananŋana, na kaimer ni ko ipamiaŋ naana.

¹⁶Sombe wal sananŋan timasak ma tiwe boozo, na mbulu sananŋana ko ipet ma iwe biibi. Tamen kaimer wal ndeeŋeŋan ko tire kat ki matan ta kembei: Wal sananŋan ko tisu ma mburan imap.