Sua Tutŋana 27:6-20

⁶Kom koi, ni irao ikam mbulu ambaimbaiŋan boozomen pu, bekena ipakaamu mi ikam lelem. Mi torom ŋonoono ta iurur kat leleene pu, na ni ko iyaamba katu mi ipazalu.

⁷Tomtom ta so ikan kini ma kopoono bok, nako leleene be ikan kini mini som. Koroŋ ambaiŋana kat tomini kembei bigil suruunu, ni ko leleene pa som. Mi tomtom ta so peteli, na irao ipeleele kini sa na som. Kini sananŋana tomini, ni ko leleene pa mi ire kembei kini namutŋana.

⁸Tomooto ta so izem ruumu mi wal kini ma timboren, mi ila ma iwwa le sorok, ni kembei man ta izem ŋgini kini raama lutuunu bizin ma timbot, mi irie ma ila lene pa lele pakaana toro.

⁹Ŋgere mi koroŋ pakan ta kuzinŋan na, sombe tusuulu kulindi pa, ina ikamam ti ma nindi se mi lelende ambai. Mi torondo bizin ta kembena. Sombe tiuulu iti pa ŋgar ambaimbaiŋan pakan, ina ikam ti ma lelende ambai.

¹⁰Itum torom bizin ziŋan tomom toroono bizin na, pizil ndemem pizin pepe. Mi sombe pataŋana sa indeeŋu mi toŋmatiziŋ ku timbotmbot molo, na la kizin pepe. Koŋuru zin wal ta timbotmbot kolouŋana pu na. Pa zin ko tikam ulaaŋa biibi pu ma tilip pizin toŋmatiziŋ ku ŋonoono.

¹¹O lutuŋ, motom iŋgal be swe ŋgar ambaiŋana men pizin tomtom. Naso kam ma leleŋ ambai. Mi zin wal ta tigiibi sua repiiliŋana pio, sombe tire mbulu ku, nako sua kizin imap.

¹²Tomtom ta so le ŋgar, na irao iur itunu ila zaaba kwoono sorok na som. Sombe ikilaala kembei pataŋana be ipet, na loŋa men mi iru zaala be iko pa. Mi zin wal ta len ŋgar biibi som na, tila men. Tabe tindeeŋe pataŋana.

¹³Waem sa, sombe imbuk sua pa tomtom toro ta ni iute i som na ma iso: “Sombe nu rao be kot mbun ku som, na nio ko aŋmender pu mi aŋkot.” Ina ni ikam mbulu kankaanaŋana kat. Tana sombe ni iso pu be kam mbulu raraate men pini, na ndemeeri pepe. So pini be ikam koroŋ kini pakan ma imar imbot ku. Beso ni ikot som, to koroŋ kini tana iwe lem.

¹⁴Sombe waem sa ikenne, mi mbeŋbeŋŋana mi nu la kini ma kalŋom izalla mi kam mankwoono pini, ko leleene ambai? Som. Ko kam ma keteene malmal kembei ta piri sua sananŋana pini.

¹⁵Sombe kusindi bizin tinoknok zooroŋana mi tiŋoŋooŋo, inako tikam ma mbotŋana kiti isaana, kembei ruumu ta ka kooto sumbunsumbun, mi yaŋ itoptop su ruumu leleene na.

¹⁶Zin moori ta kembei, tayaraama zin, na tarao som. Ina kembei totoombo be teteege miiri, som koroŋ sipirpirŋana.

¹⁷Sombe totwooro buza, na tere ka pail ta tiurpe pa ain na. Pa ain men ta irao ikam uraata pa ain. Mi ina raraate men piti tomtom. Bela taparuluulu iti pa ŋgar mi taparpazalzal ti, tona takam ma mbulu kiti iŋgeeze.

¹⁸Tomtom ta so imborro kat ke fik, nako ikan ka ŋonoono. Mi zin mbesooŋo ta kembena. Sombe timboro kat uraata ta zin bibip kizin tiur la naman, nako zan iwe biibi.

¹⁹Iti sombe lelende be tere ruŋgundu, na titiiri itundu ila yok. Mi sombe lelende be tuute iti tomtom pareiŋanda, na tere mbulu tau tomtom tikamam piti na. Pa ina iswe iti.

²⁰Meeteŋana ikam wal boozomen kek. Tamen imap zen. Mi iti tomtom ta kembena. Takam lende koroŋ boozo kek. Tamen toso: “Iŋgi irao zeen.”