Sua Tutŋana 25:5-20

⁵Mi ina raraate men pizin wal sananŋan. Sombe tatatke zin pa king kereene uunu ma tila len, to king ikam mbulu ndeeŋeŋana men mi peeze kini imbol.

⁶Sombe mbotmbot raama king, na pakur itum pepe, mi serseere be gaaba zin bibip pakan pepe.

⁷Kokena kaimer king iseru ma la lem, to kom miaŋ biibi ila matan. Tana mbotmbot mi namnaama. Sombe king itunu iboobu be sala kini, tona la. Zaala ta kembei, ina ambai ma ilip.

⁸Sombe nu re waem sa ikam ŋoobo mbulu, na loŋa pamenderi ila zin bibip matan pepe. Mbot mi kam kat ŋgar muŋgu. Pa sombe sua ku ila ma ambai som, mi waem tana ilip, nako kom miaŋ biibi. Manako kam so?

⁹Sombe nu niomru waem sa koŋooŋo, na koŋooŋo lak! Mi re: Kokena kwom iyabakes pa wal pakan sua kizin turkeŋan.

¹⁰Pa sombe zitun tileŋ, nako tipamiaŋu ma urum isaana kat. Kaimer urum ko irao ambai mini na som.

¹¹Tomtom sa isombe iso sua ma sua kini itop la kat, na tere kembei ambai. Ina kembei aigau milmilŋana ta tiurpe pa gol ma silba na.

¹²Tomtom ta le ŋgar ambaiŋana na, isombe ipazal tomtom sa mi tomtom tana ileŋ la kalŋaana, na tere kembei ambai. Ina tomini kembei aigau milmilŋana ta tiurpe pa gol na.

¹³Sombe zin bibip tiŋgo mbesooŋo kizin tasa ma ila pa uraata sa, mi ni ikam kat uraata tana, inako zin bibip kini lelen ambai kat mi tiso: “Ulei,” kembei wal uraata kan ta keten su mi tiwin kan yok lomoŋana na.

¹⁴Tomtom ta so ipakurkur itunu sorok pa kampeŋana kini, mi tamen ikamam koroŋ pizin tomtom som, ina ni kembei miiri tiene ta igabgap ma imar ila ne, mi yaŋ sa isu som.

¹⁵Sombe zin bibip ŋgar kizin imbol kat pa koroŋ sa mi nu lelem be tooro ŋgar kizin, na toombo be kam sua riŋariŋa men pizin. Pa sombe nim gesges som, mi noknok men sua luumuŋana pizin, nako kam ma tileŋ la kalŋom.

¹⁶Nu sombe ndeeŋe bigil suruunu, na win ma zaza pepe. Kokena ipasaana kopom, to lulu.

¹⁷Mi waem bizin ta kembena. Lala taparpaara pa ruumu kizin pepe. Kokena pagesges zin, to kam ma lelen be tire u mini som.

¹⁸Tomtom ta so iŋgal sorok sua pakaamŋana pa waene toro, ina sua kini ko ipasaana waene toro tana kembei zaaba, buza, o peene lutuunu mataanaŋana.

¹⁹Re. Sombe zoŋondo iyoyou, ko tarao be takan kini? Mi sombe kumbundu imbekes, ko tarao be temender se? Som. Mi zin wal ta ndemeereŋan som na, ta kembena. Irao tapase pizin pa mazwaana ki pataŋana na som.

²⁰Mi parei? Sombe lele ilomo kat, mi waem sa ikoto i pa kawaala, mi nu la ma tatke pini, ko leleene ambai? Som. Mi sombe lombo ise mbeete ku keteene, ko lelem ambai? Som kat! Mi zin wal ta timbot la pataŋana leleene na, ta kembena. Sombe kalŋanda izalla mi tombombo lende mboe mi zin tileŋ, nako tapasaana lelen.