Sua Tutŋana 25:20-28

²⁰Mi parei? Sombe lele ilomo kat, mi waem sa ikoto i pa kawaala, mi nu la ma tatke pini, ko leleene ambai? Som. Mi sombe lombo ise mbeete ku keteene, ko lelem ambai? Som kat! Mi zin wal ta timbot la pataŋana leleene na, ta kembena. Sombe kalŋanda izalla mi tombombo lende mboe mi zin tileŋ, nako tapasaana lelen.

²¹Sombe kom koi sa peteli, na kam ka kini. Mi so miri i, na kam ka yok.

²²Naso kami ma ka miaŋ biibi pa mbulu ta ni ikam pu na, mi Yooba ikam lem kadoono ambaiŋana.

²³Sombe taŋgal sorok sua pakaamŋana pizin tomtom, inako tapas keten mi zurun imbukmbuk piti, kembei ta re ipol mi ipei miiri ma duubu.

²⁴Sombe kusim inoknok zooroŋana mi iŋoŋooŋo, na mbotmbot raami lela ruumu leleene pepe. Ambai be yooto ma wwa lem mat!

²⁵Sombe tomtom sa ileŋ uruunu ambaiŋana sa ta imbot lele molo mi imar, nako ikami ma leleene ambai, kembei tomtom ta ikam uraata ma niini isaana mi iwin ka yok lomoŋana.

²⁶Sombe wal sananŋan tikamam mbulu sananŋana mi tomtom ndeeŋeŋana sa igedgeede zin men, na ni kembei yok touŋana, som yok bukbukŋana ta imunmuundu ma isaana na.

²⁷Sombe tiwin bigil suruunu ma zaza, ina ambai som. Mi sombe takam kinkiini be zanda iwe biibi, ina tomini ambai som.

²⁸Sombe tomtom sa irao be iyaraama itunu som, na ni kembei kar ta ka siiri borok su lene, mi koroŋ sa imbot be ipakaala kan koi bizin mini som.