Sua Tutŋana 23:22-31

²²Tomom ta iuru. Tana leŋleŋ la kalŋaana. Mi sombe nom iwe kolman ma isaana, na motom pasomi pepe.

²³Re: Kokena ziiri sua ŋonoono ma ila ne. Kam kinkiini pa sua ŋonoono mi ŋgar ambaimbaiŋan matakiŋa bekena kam ma iwe lem.

²⁴Pikin ta so ikamam mbulu ndeeŋeŋana, nako tamaana menmeeni biibi pini. Mi sombe ikam le ŋgar ambaiŋana, nako tamaana leleene pini ilip.

²⁵Motom iŋgal mbulu tabe ikam ma tomom ma nom lelen ambai. Kam mbulu ambaiŋana. Naso nom ta ipeebu na menmeeni biibi.

²⁶O lutuŋ, ur kat lelem pio. Mi motom iŋgalŋgal be to zaala tio.

²⁷Kozo re u pizin moori zaala lwoono kan mi zin tau tiurur nol na. Pa zin kembei naala ta isula kat.

²⁸Gorgori tizaŋzaaŋa zin tomooto kembei zin wal kuumbuŋan. Mi tikamam ma tomooto boozomen tirekreege sua kizin mbukŋana mi tipasansaana ula kizin.

²⁹Ziŋoi ta len pataŋana boozomen mi tiyakyak? Mi ziŋoi ta timbotmbot raama ŋoŋi mi tomtom tiyyo kwon pizin? Mi ziŋoi ta kulin berebere sorok, mi matan uunu isiŋsiŋ?

³⁰Ina zin wal ta tizemzem yok baen winŋana som, mi lelen be titoombo yok mbolŋan matakiŋa.

³¹Ŋonoono, yok baen ku tana isiŋsiŋ kat. Yok ta imbotmbot sula mbooro ku na, ambai kat be rre lem. Mi sombe win, na ikamam ŋgurem.