Sua Tutŋana 23:1-17

¹Sombe tomtom peeze kana sa iluŋke u ma la be niomru mbuleyom su pa kini kanŋana, na kam kat ŋgar pa kini tana ka uunu muŋgu, mana kan. Pa ni iboobu sorok som.

²Mi sombe nu motom kiniŋom, na rre be yaraama itum

³Kokena kini namtuŋana tana ikam motom, to kan sorok. Pa kini tana na, ka zaala pakaamŋana sa ko imbotmbot.

⁴Nu lem ŋgar. Tana pun kat mburom be we mbio uunu pepe. Ŋonoono, nu lelem be kam koroŋ boozo. Tamen yaraama itum.

⁵Pa koroŋ boozomen ta tomtom tindoundou isu toono na, ina imapmap karau men. Ina kembei koroŋ ta terre la pa, mi matanda kolom na, ila ne kek. Nu so koroŋ ku tana ko imbotmbot ma molo? Som. Ko kembei ta manboŋ. Itir begeene na, irie ma ila ne kek!

⁶Zin wal ta so tikampewe zin tomtom som na, ŋgurem kutkut pa kini kizin pepe. Ŋonoono, kini ambaimbaiŋan matakiŋa imbotmbot se mbalia kizin be kan. Mi kini tana ikam motom pepe.

⁷Pa wal ta kembei, gorgori tikamam ŋgar biibi pa pat kizin ta tipasansaana pa kini na. Ŋonoono, kwon na, tiso pu be kan ma win. Mi tiur kat lelen pu som.

⁸Tana kini ri ta so kan, na kaimer ko lulu. Mi sua pakurŋana ta so kam pizin pa kini tana, na nu so sorok. Pa kaimer zin ko tikam kosasa pu mini som.

⁹Wal kankaanaŋan ta tizorzooro na, la kizin ma niomŋan koso sua pepe. Pa sua ŋgarŋana ta so kam pizin, na zin ko tirepiili kembei koroŋ sorok.

¹⁰Toono ka kambasa tau tiur ta muŋgu kek na, siri pepe. Mi sei lem toono kizin monmoondo pepe.

¹¹Pa zin len Tomtom Mburaanaŋana ta imbotmbot be imenderkaala zin. Sombe niomru kakam sua, ko rao?

¹²Sua pazalŋana ta so tikam pu, na kiskis ma imbol la lelem. Mi sua ta izzwe ŋgar ambaiŋana na, ŋgungun talŋom pa.

¹³Sombe lutum sa ikamam ŋoobo mbulu, na leeli pepe. Kam ke mi balisi pa bekena pazali. Kam ŋgar boozo pepe. Ni ko irao imeete na som.

¹⁴Tana balisi. Naso kamke i pa zaala ki meeteŋana.

¹⁵O lutuŋ, sombe nu kiskis ŋgar ambaiŋana ila lelem, nako kam ma leleŋ ambai kat.

¹⁶Mi sombe sua ndeeŋeŋana men iwedet pa kwom, nako leleŋ ndabok kat.

¹⁷Zin wal ta mbulu kizin irao pa Anutu mataana som na, motom berber pizin pepe. Zoŋ ise ma ila zoŋ isula na, mototo Yooba mi leŋleŋ la kalŋaana.