Sua Tutŋana 22:5-13

⁵Zaala ta wal sananŋan titoto, ina ipata. Pa worwooro matanmatanŋan mi kilis boozomen imbotmbot la. Tana tomtom ta so mataana iŋgalŋgal itunu, nako imbotmbot molo pa zaala kizin.

⁶Paute lutum pa zaala tabe ito i. Naso itum raama ŋgar ambaiŋana, mi ikiskis ma irao iwe kolman. Irao izem na som.

⁷Wal sorrokŋan tileŋleŋ la zin mbio uunu kalŋan. Irao tizooro zin na som. Mi tomtom ta so ikam mbun, nako iwe kembei mbesooŋo sorok pa tomtom ta iuuli na.

⁸Mbulu sananŋana ta tomtom tiwaswaaza, ina kaimer ipiyotyooto pataŋana pizin. Tona mburan imap, mi tirao be tipasaana zin tomtom mini som.

⁹Tomtom ta mata merereŋana, nako indeeŋe kampeŋana. Paso irairai kini mi koroŋ kini pakan pizin wal sorrokŋan.

¹⁰Zin wal ta tizorzooro mi tirepilpiili ŋgar ambaiŋana na, ziiri zin ma tila len. Naso mbulu ki zooroŋana, ŋoŋi, mi repiiliŋana imap.

¹¹Tomtom ta so leleene ŋgeezeŋana mi ikamam sua ambaiŋana men, nako king itunu leleene pini mi ikami ma iwe le gaabaŋana.

¹²Yooba itunu ta mataana pa ŋgar ambaiŋana. Mi zin wal pakamkaamŋan tau tisu mini mi tiur koi pa zitun wal kizin na, ni ikamam ma sua kizin iurur ŋonoono som.

¹³Wal maolŋan, sombe toso pizin be tila tikam uraata, na tipandelndel sua piti ta kembei: “Aiss, nio mburoŋ som. Ko aŋdeeŋe laion sa isu zaala lwoono mi ikan yo, som wal sananŋan tipun yo ma aŋmeete ma iŋgi.” Tana tila pa uraata som.