Sua Tutŋana 21:11-28

¹¹Zin wal ta tipakurkur zitun mi tirepilpiili ŋgar ambaiŋana na, sombe tire kadoono pa mbulu kizin, nako ipei ŋgar kizin wal ta len ŋgar biibi som na. Mi zin wal ta len ŋgar ambaiŋana na, sombe tapaute zin, nako tikam len ŋgar pakan ma isala ki.

¹²Anutu, ni ndeeŋeŋana, mi iute mbulu boozomen ta iwedet lela wal sananŋan ruumu kizin. Tanata ipasansaana zin.

¹³Tomtom sa isombe izeeze talŋaana pa tiŋiizi kizin wal ta timbotmbot raama pataŋana na, kozo ire i. Pa kaimer sombe itaŋroro pa le ulaaŋa sa, nako irao tileŋi na som.

¹⁴Sombe tomtom sa keteene malmal kat piti mi teseŋgeere le koroŋ ambaimbaiŋan pakan, nako tapaluumu leleene. Seŋgeeri ta so takam pini ki keŋana, nako iurpe leleene.

¹⁵Sombe zin bibip tiurpewe pataŋana kizin tomtom, ina ikam zin wal ndeeŋeŋan ma lelen ambai kat. Tamen zin wal ta tikamam mbulu sananŋana na, tire ma timoto kan.

¹⁶Tomtom ta so isaŋsaŋ pa zaala ki ŋgar ambaiŋana, nako imeete ma ila igaaba zin wal meeteŋan.

¹⁷Tomtom ta so leleene ilip be ikam le mbulu matakiŋa ta ki kulindi i, nako isu ma imbot ŋoobo. Mi sombe tomtom sa leleene ilip pa kini namutŋana mi yok baen, mi iwirri pat biibi pa, na ni ko irao iwe mbio uunu na som.

¹⁸Pataŋana tabe ikam zin wal ndeeŋeŋan mi zin wal tau tikamam kat mbulu i, ina Yooba ipiŋgisŋgis pizin, mi ilala ma ikamam zin wal sananŋan mi zin wal pakamkaamŋan tau tisu mini mi tiur koi pa zitun wal kizin na.

¹⁹Sombe kusim inoknok zooroŋana mi iŋoŋooŋo, na mbotmbot raami lela ruumu pepe. Ambai be zemi mi la mbomboorem lele bilimŋana sa.

²⁰Zin wal ta len ŋgar ambaiŋana na, ruumu kizin bok pa koroŋ ndabokbokŋan matakiŋa. Mi wal kankaanaŋan ta tizorzooro na, tirao be tiyaraama zitun som. Tana tipasansaana koroŋ kizin ta boozomen pa koroŋ soroksorok.

²¹Tomtom ta so ikamam kinkiini be ito zaala ndeeŋeŋana mi iurur leleene pizin tomtom, nako ikam mbotŋana ambaiŋana, mi zaana iwe biibi, mi iwe tomtom ndeeŋeŋana.

²²Ŋonoono, kar pakan wal mburanŋan. Mi tomtom ta le ŋgar ambaiŋana na, ni ko irao be ikam malmal pizin mi ireege siiri kizin mbolŋana ta tipase pa na.

²³Sombe lelem be pataŋana ikamu som, na motom iŋgalŋgal be mboro kat kwom!

²⁴Zin wal ta tizorzooro mi tipasomsom zin tomtom, na tawatwaata zin be wal matan repiiliŋan. Wal ta kembei timbel pakurŋana. Pa tiso tilip pizin tomtom ta boozomen.

²⁵Wal maolŋan lelen ilip be tikam len koroŋ. Tamen naman ikamam uraata som. Tana tiru zaala pakan be tikam len koroŋ, mi ina ipasaana zin ma timeete.

²⁶Zoŋ ise ma ila zoŋ isula na, wal maolŋan timbombooren, mi ŋgar kizin ilala pa koroŋ boozomen ta lelen pa i. Mi wal ndeeŋeŋan na, tirairai koroŋ kizin pakan pizin wal sorrokŋan. Tirutruutu som.

²⁷Patoronŋana kizin wal sananŋan na, Anutu leleene pa ri sa som. Mi re beso tikam patoronŋana kizin raama ŋgar sananŋana sa, na ni leleene pa ri sa som kat!

²⁸Tomtom ta so ipombol sua pakaamŋana, nako ila lene. Mi tomtom ta so ileŋleŋ kat sua, nako tomtom lelen be tiŋgun talŋan pa sua kini.