Sua Tutŋana 1:5-21

⁵Mi zin wal ta len ŋgar biibi na, zin tomini irao tileŋ la sua ti. Naso tiseeŋge ŋgar kizin. Zin wal tau ŋgar kizin ipet kek na, sua tiŋgi irao ikam peeze pizin.

⁶Sua tiŋgi ko iuulu iti be takam kat ŋgar pa sua matakiŋa: sua tutŋan, sua tooroŋan, mi sua pambaaraŋan kizin wal ŋgarŋan, ramaki sua kizin pakan ta tizzo na.

⁷Mbulu tau tomototo Yooba mi teleŋleŋ la kalŋaana, ina ŋgar ambaiŋana uunu ŋonoono. Tamen wal kankaanaŋan ta tizorzooro na, matan repilpiili ŋgar ambaiŋana mi sua pazalŋana.

⁸O lutuŋ, sombe tomom ipazalu, na leŋ la sua kini. Mi mbulu ambaiŋana ta nom ipaute u pa na, ta kembena. Zem pepe. Kiskis mi to.

⁹Pa sua kizin ko iurpe mbulu ku ma ambai pa Anutu mi tomtom matan, kembei natabu ma mogar ta iwe aigau piti na.

¹⁰Lutuŋ, sombe wal sananŋan tiwatu pa sua kizin mbuyeeneŋana be gaaba zin, na leŋ zin pepe.

¹¹Wal tana tizzo ta kembei: “Ai, mar itiŋan tala ma teke su zaala lwoono mi tazaŋzaaŋa. Beso tomtom tasa ipa pa zaala ma imar, to tupuni sorok ma imeete.

¹²Ko tapamorsopi, mi tupuni ma imeete, kembei meeteŋana ipamorsop tomtom mata yaryaaraŋana, mi imeete karau men ma isula lene naala.

¹³Naso takam lende koroŋ ambaimbaiŋan matakiŋa ta kan kadon bibip i, mi tadaaba ruumu kiti pa mburu tana ma bok.

¹⁴Mi nu ta kembena. Sombe gaaba yam, inako amur ndomom tomini. Pa mburu ta so takam na, ko tarai ma lende lende.”

¹⁵O lutuŋ, sombe tikam sua ta kembei pu, na ruutu itum, mi la gaaba zin pepe. Zaala ta titoto na, nu to zin pa pepe.

¹⁶Pa zin na, karau men mi timaŋgaŋga be tikam zaaba pizin tomtom, mi tipun zin ma timetmeete. Tiserseere kat pa sanaana kamŋana.

¹⁷Kwiili ta imbot la mban na, ye tire kek. Tamen tikam kinkiini pa mban be tikan, tana tila ma kwiili ikam zin.

¹⁸Mi wal sananŋan tana ta kembena. Mbulu kizin ta tikewe mi tizaŋzaaŋa zin tomtom, ina kaimer ko imiili pizin mi ikam zaaba pizin ma timetmeete. Tamen tikilaala som, mi tila men.

¹⁹Ŋonoono kat. Wal boozomen taso tikamam malmal be tikem len koroŋ, na zaala kizin ta kembei. Mbulu kizin tana ko ipasaana mbotŋana kizin, mi tisaana ma tila len.

²⁰Ŋgar ambaiŋana ikewe piti som. Ina kembei moori ta imbotmbot zaala biibi, mi ilala nol uunu tomini mi ipaŋarairai kalŋaana.

²¹Mi sombe zin iwal biibi tilup zin su kar keteene, som zaala kwoono, na ni iboboobo zin ma izzo ta kembei: