Sua Tutŋana 18:4-21

⁴Sua ta iwedet pa tomtom kwon, ina kembei yok ta ka li biibi. Pa sua kizin ka uunu biibi, mi uunu pakan na ike. Ŋgar ambaiŋana ta tomtom tipiyotyooto, ina kembei yok bukbukŋana ta irereere ma iwedet.

⁵Sombe tuurpe pataŋana kizin wal ndeeŋeŋan som, som talae kizin wal sananŋan, ina ambai som.

⁶Sua ta iwedet pa wal kankaanaŋan kwon, ta ipazas tomtom keten ma tikamam sua boozo pizin. Sua kizin talliŋana ikamam ma tomtom lelen be tiballis zin men.

⁷Wal kankaanaŋan ta tizorzooro na, zitun kwon ta ipasansaana zin. Sua kizin iwe kembei ta kilis be ikeene zin.

⁸Zin wal ta tininin kao na, tomtom lelen pa sua kizin kembei kini ta inamut kat. Mi tere iti. Pa sua kizin sananŋana tana ko isula kat lelende ma ipasaana ŋgar kiti.

⁹Mbulu ki tamaol pa uraata, ina igabgaaba mbulu zigzikŋana. Mbulu ru tana tiwe kembei ta toŋmatiziŋ.

¹⁰Yooba zaana, ina iwe kembei ruumu mbolŋana piti. Wal ndeeŋeŋan tilonloondo pa ruumu tana, tabe timbotmbot ambai.

¹¹Mi zin wal ta mbio uunu na, tipase pa koroŋ kizin be iwe siiri mbolŋana pizin. Mi tindemeere ma tiso pataŋana sa ko irao ilela siiri kizin tana leleene na som.

¹²Tomtom sa sombe leleene bok pa ŋgar pakurŋana, nako molo som to isu ma iwe koroŋ sorok. Mi mbulu ki tokototo itundu mi tembesmbeeze pizin tomtom, ina iwe zaala piti be kaimer zanda iwe biibi.

¹³Mbot mi waem toro iposop sua kini muŋgu, mana pekel. Serseere pa sua pepe. Pa ina mbulu kankaanaŋana tabe ipamiaŋu.

¹⁴Iti sombe mete ikam ti, mi tamen lelende ambai, inako ipombolmbol ti. Mi sombe koroŋ sa ipasaana kat lelende, ina pataŋana biibi. Asiŋ irao be ibaada? Som.

¹⁵Zin wal ta tikilaala ŋgar iŋgoi ta ambai ma ilip na, tikamam len ŋgar pakan ma isala ki. Pa zin wal ta len ŋgar ambaiŋana na, gorgori tirru len ŋgar pakan, mi tiŋgungun talŋan pa.

¹⁶Zin wal ta tiso tire tomtom biibi sa, nako naman men ma tila kini na som. Matan iŋgalŋgal be tikam koroŋ ambaiŋana sa be tikam pini. Pa zin tiute: Koroŋ tana ko iwe zaala pizin be tila kat kini ma ziŋan tiso sua.

¹⁷Wal ru tisombe timender pa sua, mi kizin tasa iso sua kini muŋgu, nako tere kembei tomtom tana ilip to ambai. Tamen wiŋana imiili pini zen. Tana tombot mi teleŋ wiŋana pakan tabe tikam pini i. Naso tuute: Ni iso sua ŋonoono, o som?

¹⁸Sombe wal ru ta tiparwe kan koi na, timender pa sua mi sua kizin iporou mete, ina ambai be takam mbulu sa bekena Anutu itunu iswe asiŋ ta iso sua ŋonoono. Naso sua kizin tana imap.

¹⁹Sombe takam ŋoobo tomtom sa ma leleene iŋgis, ina ipata be takam leleene ma imiili piti mini. Pa ŋgar kini ko imbol kat kembei siiri mbolŋana ta iliu kar na. Mi sombe ŋoŋi sa imbotmbot la wal pakan mazwan, ina iwe mbukuunu biibi pizin mi ikam zin ma tiparmbot molo pizin.

²⁰Sua ta so kwondo ipiyotyooto, nako tere ka ŋonoono imiili piti, mi takan ma kopondo bok pa. Sombe sua kiti ambai, nako ipiyooto ŋonoono ambaiŋana piti, mi ikam ma lelende ndabok.

²¹Kwondo na, mburaana biibi. Irao ikam ti ma tombot ambai, mi irao ipasaana iti ma temeete ma tala lende tomini. Tana zin wal ta lelen be tizzo sua, nako tire mbulu kizin tana ka ŋonoono.