Sua Tutŋana 16:1-13

¹Ŋonoono, iti tomtom lelende iurur pa mbulu matakiŋa tabe takam i. Mi sua ta iwedet pa kwondo na, Yooba itunu ta ikamam peeze pa.

²Iti tomtom tendemeere itundu kembei mbulu kiti ta boozomen iŋgeeze men pa Anutu mataana. Mi Yooba, ni itirtiiri lelende mi iute uunu tau takamam mbulu kiti pa i.

³Uraata boozomen ta lelem iurur pa be kam na, ur ila Yooba namaana. Naso ŋgar ku tana iur ŋonoono.

⁴Koroŋ boozomen ta Yooba iur na, kan uraata makiŋ. Zin wal sananŋan tomini. Yooba iur zin beso kan nol ipet, to iswe kete malmalŋana kini pizin.

⁵Zin wal ta so tipakurkur zitun mi tikamam ŋgar kembei tilip pa waen bizin pakan na, Yooba leleene pizin ri sa som kat. Tana kam ŋgar boozo pizin pepe. Kola tire kadoono pa mbulu kizin tana. Ni ko irao ileele zin na som.

⁶Iti sombe tuurur lelende pa Yooba mi zin tomtom, mi tototo sua kiti mbukŋana, nako Yooba ireege sanaana kiti ma ila lene. Mi mbulu tau tomototo Yooba mi teleŋleŋ la kalŋaana, ina iuluulu iti be tombotmbot molo pa mbulu sananŋana.

⁷Iti sombe takamam mbulu kiti ma irao Yooba leleene, na ni ko ikam ma kanda koi bizin tomini lelen piti, mi itiŋan taparlup ti ma tombot ambai.

⁸Iti sombe lende koroŋ rimen, mi tamen mbulu kiti indeeŋe men pa Anutu mataana, na mbotŋana kiti ko ambai ma ilip pizin wal ta tikam len koroŋ boozomen pa zaala sananŋana.

⁹Sombe lelende iurur pa ŋgar sa. na bela Yooba iyok pa ŋgar kiti tana, tona iur ŋonoono.

¹⁰Sua ta iwedet pa king kwoono, ina Yooba ta ikamam peeze pa. Tana king isombe iurpe pataŋana kizin tomtom, na bela ikam ma indeŋdeeŋe men.

¹¹Iti sombe lelende be takam ŋgomo pa koroŋ sa, na Yooba leleene be tuur ka kadoono ma irao kat pa ka kin. Kokena tasala sorok pizin wal pakan, mi pakan na, tusu pizin. Takam kadoono raraate men pizin wal ta boozomen. Pa mbulu ta kembei, ina imar pa Yooba.

¹²Mbulu sananŋana na, zin king lelen pa ri sa som kat. Pa zin tiute: Bela lele ta zin timborro na titoto mbulu ndeeŋeŋana men, to peeze kizin imbol.

¹³Tomtom ta so kwoono izzwe mbulu ndeeŋeŋana na, zin king ko lelen ambai pini. Mi zin wal tau tizzo katkat sua ŋonoono men ta kembena. Zin king lelen pizin mi tipase pizin.