Sua Tutŋana 14:9-30

⁹Sombe tomtom sa ikam patoronŋana pa sanaana kini, na wal kankaanaŋan ta tizorzooro na, ko tikam sua repiiliŋana pini. Mi zin wal ta tikamam kat mbulu na, Anutu leleene pizin.

¹⁰Tomtom toro sa irao iute kat lelende na som. Pa sombe lelende ipata kat, som menmeen ti biibi, na iti itundu men ta tayamaana.

¹¹Mbotŋana kizin wal sananŋan ko kembei ruumu ta ibuuzu ma borok su lene. Mi zin wal ta tikamam kat mbulu na, mbotŋana kizin ko kembei ruumu ta imbol ma imbotmbot.

¹²Zaala pakan ta tomtom titoto na, tindemeere ma tiso ko zaala ambaimbaiŋan. Mi som. Ina zaala ki meeteŋana.

¹³Wal pakan tizeŋzeeŋge sorok. Tamen lelen na, ambai som. Mi tomtom pakan ta koozi lelen ambai mi menmeen zin na, kaimer ko lelen ipata.

¹⁴Tomtom ta so ipizil ndemeene pa zaala ki Anutu, nako ire kat kadoono pa mbulu kini tana. Mi wal ambaimbaiŋan ta kembena. Zin ko tikam len kadoono ambaiŋana pa mbulu ta tikamam na.

¹⁵Zin wal ta len ŋgar biibi som na, tikanan la sorok sua ta boozomen. Mi wal ŋgarŋan na, tikamam ŋgar pa zaala ta titoto na: Zaala tana ambai, som ambai som?

¹⁶Tomtom ta le ŋgar ambaiŋana na, imototo kana mi imbotmbot molo pa koroŋ sananŋan. Mi wal kankaanaŋan ta tizorzooro na, tipase pa zitun ma tiso tirao. Tanata timototo som, mi tikamam mbulu talliŋana tabe ipasaana zin i.

¹⁷Tomtom ta so keteene malmal karau, nako ikam mbulu talliŋana. Mi zin wal ta gorgori tirru zaala be tikam mbulu sananŋana na, tomtom tiurur koi pizin.

¹⁸Zin wal ta len ŋgar biibi som na, tipamalmaala mbulu kizin talliŋana, kembei zin naroogo kan tipamalmaala aigau kizin. Mi zin wal ta len ŋgar ambaiŋana na, ŋgar kizin tana iswe zin kembei zan bibip, kembei mogar ta zin king tiurur na.

¹⁹Wal sananŋan ko tilek kumbun pizin wal ambaimbaiŋan. Ko tilala pa wal ndeeŋeŋan ruumu kizin kwon kwon, mi tipakurkur zin.

²⁰Wal sorrokŋan na, waen bizin tiurur kat lelen pizin som. Mi zin wal ta mbio uunu na, len tomtom boozo.

²¹Tomtom ta so mata pasom waene bizin, ina ni ikam sanaana. Mi tomtom ta so imuŋaiŋai zin wal ta timbot ŋoobo na, ni ko leleene ambai mi kampeŋana biibi imbotmbot se kini.

²²Zin wal ta lelen iurur pa mbulu sananŋana na, tisaŋsaŋ pa zaala ambaiŋana kek. Mi tomtom ta so irru zaala be ikam mbulu ambaiŋana pizin tomtom, na tomtom ko tiurur kat lelen pini. Irao tizemi na som.

²³Uraata boozomen ta so takam kat, inako iuulu iti. Mi sombe tombomboorende men, mi toyyo kwondo pa sua soroksorok, nako molo som to tusu ma tombot ŋoobo.

²⁴Zin wal ta len ŋgar ambaiŋana na, tirao kat pa koroŋ boozo, mi koroŋ kizin tana iswe zin kembei zan bibip, kembei mogar ta zin king tiurur na. Mi wal kankaanaŋan ta tizorzooro na, ta kembena. Mbulu kizin talliŋana ta izzwe zin.

²⁵Tomtom ta so ikam ŋoobo mbulu sa som, mi tipamenderi sorok be tipuni ma imeete, sombe le gaabaŋana sa be iso sua ŋonoono mi ipombol sua kini, na gaabaŋana tana ko irao be ikamke i. Mi sombe tomtom pakamkaamŋana sa ipombol tomtom toro sua kini, na irao tendemeere sua kini tana na som. Pa sua kini tana ko pakaamŋana.

²⁶Tomtom ta so imototo Yooba mi ileŋleŋ la kalŋaana, nako ipase pa Yooba be iporoukaali. Mi lutuunu bizin tomini ko tipase pa Yooba be iwe ur pizin.

²⁷Mbulu ki tomototo Yooba mi teleŋleŋ la kalŋaana, ina kembei yok bukbukŋana ta ipiyotyooto mbotŋana ambaiŋana piti. Pa ipiŋgisŋgis kumbundu pa kilis boozomen tabe ikam ti ma temeete i.

²⁸King sa, sombe imborro iwal biibi, nako niini ise mi ikam zaana biibi. Mi sombe imborro wal boozo som, inako mbotŋana kini isaana, mi zaana biibi som.

²⁹Sombe tomtom sa leleene luumuŋana, ina iswe i kembei ni le ŋgar biibi. Mi tomtom ta so keteene malmal karau, ina ni ipamaala mbulu kini talliŋana ma imbot kat mat.

³⁰Sombe lelende ambai, nako ikam ma kulindi imbot ambai tomini. Mi sombe matanda mburmbur, inako ikam mete piti.