Text copied!
CopyCompare
Anutu Sua Kini Potomaxana - Sua Tutŋana - Sua Tutŋana 14

Sua Tutŋana 14:2-31

Help us?
Click on verse(s) to share them!
2Sombe tomtom sa ipa pai kini ma ambai men pa Yooba mataana, ina iswe i kembei ni imototo Yooba, mi ileŋleŋ la kalŋaana. Mi sombe tomtom sa itoto zaala pakaamŋana, ina iswe i kembei ni irepilpiili Yooba kembei koroŋ sorok.
3Wal kankaanaŋan ta tizorzooro na, sua kizin talliŋana ta iwe uunu pizin be teene ikan zin. Mi wal ta len ŋgar ambaiŋana na, sua kizin iporoukalkaala zin ma timbotmbot ambai.
4Sombe tiŋgiimi lende bapolo, nako lende uraata be tuputu i. Mi irao tomoto pa ka uraata pepe. Pa ulaaŋa tabe ni ipimiili piti i, ko biibi ma ilip. Ko ikam ma mokleene kiti ipiyooto kini boozo.
5Tomtom ŋonoono isombe ipombol tomtom toro sua kini, na irao ipakaam na som. Mi sombe tomtom pakamkaamŋana sa ipombol tomtom toro sua kini, na irao tendemeere sua kini tana na som. Pa zin wal ta kembei, kwon bok pa sua pakaamŋana.
6Tomtom ta so ipakurkur itunu mi irepilpiili ŋgar ambaiŋana, sombe iru ŋgar ambaiŋana, nako irao indeeŋe na som. Ko ike pini. Mi zin wal ta ŋgar kizin ipet kek, nako imarra pizin be tikam len ŋgar pakan ma isala ki.
7Wal kankaanŋan ta tizorzooro na, garrau zin pepe. Mbotmbot molo pizin. Pa ŋgar ambaiŋana sa ko irao iyooto pa kwon na som.
8Wal ŋgarŋan na, matan iŋgalŋgal zitun mi tikamam ŋgar pa zaala ta titoto na: Zaala tana ambai, som ambai som? Mi wal kankaanaŋan ta tizorzooro na, ŋgar kizin talliŋana ipakankaana zin.
9Sombe tomtom sa ikam patoronŋana pa sanaana kini, na wal kankaanaŋan ta tizorzooro na, ko tikam sua repiiliŋana pini. Mi zin wal ta tikamam kat mbulu na, Anutu leleene pizin.
10Tomtom toro sa irao iute kat lelende na som. Pa sombe lelende ipata kat, som menmeen ti biibi, na iti itundu men ta tayamaana.
11Mbotŋana kizin wal sananŋan ko kembei ruumu ta ibuuzu ma borok su lene. Mi zin wal ta tikamam kat mbulu na, mbotŋana kizin ko kembei ruumu ta imbol ma imbotmbot.
12Zaala pakan ta tomtom titoto na, tindemeere ma tiso ko zaala ambaimbaiŋan. Mi som. Ina zaala ki meeteŋana.
13Wal pakan tizeŋzeeŋge sorok. Tamen lelen na, ambai som. Mi tomtom pakan ta koozi lelen ambai mi menmeen zin na, kaimer ko lelen ipata.
14Tomtom ta so ipizil ndemeene pa zaala ki Anutu, nako ire kat kadoono pa mbulu kini tana. Mi wal ambaimbaiŋan ta kembena. Zin ko tikam len kadoono ambaiŋana pa mbulu ta tikamam na.
15Zin wal ta len ŋgar biibi som na, tikanan la sorok sua ta boozomen. Mi wal ŋgarŋan na, tikamam ŋgar pa zaala ta titoto na: Zaala tana ambai, som ambai som?
16Tomtom ta le ŋgar ambaiŋana na, imototo kana mi imbotmbot molo pa koroŋ sananŋan. Mi wal kankaanaŋan ta tizorzooro na, tipase pa zitun ma tiso tirao. Tanata timototo som, mi tikamam mbulu talliŋana tabe ipasaana zin i.
17Tomtom ta so keteene malmal karau, nako ikam mbulu talliŋana. Mi zin wal ta gorgori tirru zaala be tikam mbulu sananŋana na, tomtom tiurur koi pizin.
18Zin wal ta len ŋgar biibi som na, tipamalmaala mbulu kizin talliŋana, kembei zin naroogo kan tipamalmaala aigau kizin. Mi zin wal ta len ŋgar ambaiŋana na, ŋgar kizin tana iswe zin kembei zan bibip, kembei mogar ta zin king tiurur na.
19Wal sananŋan ko tilek kumbun pizin wal ambaimbaiŋan. Ko tilala pa wal ndeeŋeŋan ruumu kizin kwon kwon, mi tipakurkur zin.
20Wal sorrokŋan na, waen bizin tiurur kat lelen pizin som. Mi zin wal ta mbio uunu na, len tomtom boozo.
21Tomtom ta so mata pasom waene bizin, ina ni ikam sanaana. Mi tomtom ta so imuŋaiŋai zin wal ta timbot ŋoobo na, ni ko leleene ambai mi kampeŋana biibi imbotmbot se kini.
22Zin wal ta lelen iurur pa mbulu sananŋana na, tisaŋsaŋ pa zaala ambaiŋana kek. Mi tomtom ta so irru zaala be ikam mbulu ambaiŋana pizin tomtom, na tomtom ko tiurur kat lelen pini. Irao tizemi na som.
23Uraata boozomen ta so takam kat, inako iuulu iti. Mi sombe tombomboorende men, mi toyyo kwondo pa sua soroksorok, nako molo som to tusu ma tombot ŋoobo.
24Zin wal ta len ŋgar ambaiŋana na, tirao kat pa koroŋ boozo, mi koroŋ kizin tana iswe zin kembei zan bibip, kembei mogar ta zin king tiurur na. Mi wal kankaanaŋan ta tizorzooro na, ta kembena. Mbulu kizin talliŋana ta izzwe zin.
25Tomtom ta so ikam ŋoobo mbulu sa som, mi tipamenderi sorok be tipuni ma imeete, sombe le gaabaŋana sa be iso sua ŋonoono mi ipombol sua kini, na gaabaŋana tana ko irao be ikamke i. Mi sombe tomtom pakamkaamŋana sa ipombol tomtom toro sua kini, na irao tendemeere sua kini tana na som. Pa sua kini tana ko pakaamŋana.
26Tomtom ta so imototo Yooba mi ileŋleŋ la kalŋaana, nako ipase pa Yooba be iporoukaali. Mi lutuunu bizin tomini ko tipase pa Yooba be iwe ur pizin.
27Mbulu ki tomototo Yooba mi teleŋleŋ la kalŋaana, ina kembei yok bukbukŋana ta ipiyotyooto mbotŋana ambaiŋana piti. Pa ipiŋgisŋgis kumbundu pa kilis boozomen tabe ikam ti ma temeete i.
28King sa, sombe imborro iwal biibi, nako niini ise mi ikam zaana biibi. Mi sombe imborro wal boozo som, inako mbotŋana kini isaana, mi zaana biibi som.
29Sombe tomtom sa leleene luumuŋana, ina iswe i kembei ni le ŋgar biibi. Mi tomtom ta so keteene malmal karau, ina ni ipamaala mbulu kini talliŋana ma imbot kat mat.
30Sombe lelende ambai, nako ikam ma kulindi imbot ambai tomini. Mi sombe matanda mburmbur, inako ikam mete piti.
31Tomtom ta so ikototo zin wal sorrokŋan, ina ni irepilpiili Anutu ta iur zin na. Mi sombe tomtom sa ikampewe zin wal ta timbot ŋoobo, inako iwe zaala pa Anutu be ikam zaana biibi.

Read Sua Tutŋana 14Sua Tutŋana 14
Compare Sua Tutŋana 14:2-31Sua Tutŋana 14:2-31