Sua Tutŋana 12:4-26

⁴Moori ta so ikamam kat uraata ma mbulu, na iwe kembei mogar pa kusiini. Pa ikamam ma kusiini niini izze. Mi moori ta so mbulu kini ipamiaŋ kusiini, ina ni kembei motmooto ta itoutou kusiini tiroono.

⁵Wal ndeeŋeŋan na, lelen iurur pa koroŋ ambaimbaiŋan men. Mi wal sananŋan na, sombe tikamam peeze piti, nako tipasaana iti. Tana irao tendemeere ŋgar kizin na som.

⁶Sua kizin wal sananŋan iwe kembei kilis be ikeene zin tomtom mi ipasaana zin. Mi wal ndeeŋeŋan na, sua kizin itatkewe zin pa pataŋana kizin.

⁷Wal sananŋan, sombe koroŋ sa ipasaana zin, nako irao timaŋga mini na som. Mi wal ndeeŋeŋan ziŋan wal kizin na, zin ko timender mbolŋana ma timbotmbot.

⁸Tomtom ta so ikamam kat ŋgar mi uraata kini ilonloondo ambai men, nako tipakuri. Mi zin wal ta tikamam ŋgar sananŋana na, tomtom tirepilpiili zin.

⁹Wal sorrokŋan ru, ta len pat riŋa be iuulu zin. Ta na, ikam ŋgar pa mboti kini, tana iŋgiimi le mbesooŋo be imbeeze pini. Mi toro na, iwirri sorok pat kini bekena ikam tomtom lelen mi tipakuri. Tabe kaimer isu ma imbot ŋoobo. Asiŋ ilip?

¹⁰Tomtom ndeeŋeŋana, ni leleene izanzaana pizin mbili kini mi imbesmbeeze pizin. Mi wal sananŋan na, tiute mbulu ki muŋaiŋana ri sa som. Tanata tiseseeze tomtom matan.

¹¹Tomtom ta so ikamam kat uraata pa mokleene kini, nako ka kini boozo. Mi zin wal ta gorgori tirru zaala pa koroŋ ta ŋonon somŋan i, na zin len ŋgar sa som.

¹²Wal sananŋan sombe tiur kilis kizin sananŋana sa be tikam zin tomtom, ina ikam zin ma lelen ambai kat. Mi tomtom ndeeŋeŋana, ni kembei ke ta uraana isula kat toono mi indom ma iwe biibi.

¹³Sua ta wal sananŋan tizorzooro pa i, ko iwe kembei ta kilis pizin. Mi wal ndeeŋeŋan na, zin len zaala be tiko pa pataŋana kizin.

¹⁴Sombe sua ambaiŋana men iwedet pa kwondo, inako ikam ti ma tombot ambai. Mi sombe namanda ikamam kat uraata, inako tere lende kadoono ambaiŋana.

¹⁵Wal kankaanaŋan ta tizorzooro na, lelen be tileŋ la tomtom toro kalŋaana som. Pa tindemeere sorok ma tiso titoto kat zaala ambaiŋana. Mi tomtom ta le ŋgar ambaiŋana na, ni ileŋleŋ la sua tutŋana ta tomtom tikamam pini na.

¹⁶Wal kankaanaŋan ta tizorzooro na, sombe wal pakan tikam mbulu sa pizin, na karau men mi keten malmal. Mi tomtom ta le ŋgar na, sombe wal pakan tipiri sua sananŋana pini, na irao niini puliizi pa na som.

¹⁷Zin wal ta titoto mbulu ŋonoono men, sombe tipombol tomtom toro sua kini, na irao tendemeere sua kizin. Pa ina sua ŋonoono. Mi sombe wal pakamkaamŋan tipombol tomtom toro sua kini, na irao tendemeere sua kizin na som. Pa ina sua pakaamŋana.

¹⁸Sua ta so takam ŋgar pa som mi tipiri sorok, ina irao ipasaana tomtom lelen ma kembei ta izi iŋgal zin. Mi sua ta iwedet pa wal ŋgarŋan kwon, ina iurpewe tomtom lelen.

¹⁹Zin wal ta kwon ipiyotyooto sua ŋonoono men, inako timbotmbot ma alok. Mi zin wal ta kwon ipiyotyooto sua pakaamŋana, inako timbot rimen mi timap.

²⁰Zin wal ta lelen iurur be tikam mbulu sananŋana na, ŋgar kizin bok pa pakaamŋana. Mi zin wal ta tirru zaala be tilup zin tomtom mibe tikam zin ma timbot ambai, inako lelen ambai kat.

²¹Tomtom ndeeŋeŋana na, koroŋ sa irao ipasaana kati na som. Mi wal sananŋan na, pataŋana ilolol zin.

²²Zin wal ta kwon ipiyotyooto sua pakaamŋana na, Yooba leleene pizin ri sa som kat. Mi zin wal ta tizzo sua ŋonoono men mi titoto sua kizin mbukŋana na, ni leleene pizin ilip.

²³Wal ta len ŋgar ambaiŋana na, sombe lelen iurur pa ŋgar sa, na irao tiso sorok pizin tomtom na som. Pa ŋgar kizin tana ko iur ŋonoono kek? Mi wal kankaanaŋan ta tizorzooro na, keten pitpit mi loŋa tizzwe ŋgar kizin talliŋana pizin tomtom.

²⁴Tomtom ki uraata, nako iwe biibi mi ikam peeze. Mi tomtom maolŋana, nako isu ma iwe mbesooŋo sorok.

²⁵Sombe lelende ipata kat, ina ipun ti ma mburanda imap. Mi sombe tomtom tikam sua ambaiŋana piti, nako ikam ma lelende ambai mini.

²⁶Tomtom ndeeŋeŋana, ni itiiri kat zin tomtom muŋgu, mana ikam zin ma tiwe toroono bizin. Mi mbulu ta wal sananŋan titoto, ina iyaryaaru zin be tizem zaala ambaiŋana.