Sua Tutŋana 10:3-23

³Wal ndeeŋeŋan na, Yooba irao izem zin ma tikan peteele na som. Mi koroŋ ta wal sananŋan lelen pa i na, ni ipiŋgisŋgis pizin.

⁴Sombe namanda ikamam kat uraata som, nako tombot ŋoobo. Mi sombe namanda ikamam kat uraata, nako lende koroŋ boozo.

⁵Sombe mazwaana ki mai ipet, mi lutundu bizin tikam uraata ma tiyo kanda kini, ina iswe kembei zin len ŋgar ambaiŋana. Mi sombe tikenne mi timbombooren, ina tipamiaŋ ti.

⁶Wal ndeeŋeŋan na, kampeŋana matakiŋa imbotmbot se kizin. Mi wal sananŋan na, tizzwe malmal tabe tikam i som. Titurkewe.

⁷Sombe wal ndeeŋeŋan timeete, na tomtom matan lala pa mbulu kizin ambaiŋana mi tipakurkur Anutu pa. Mi wal sananŋan na, zan ko isaana ma isaana kat.

⁸Wal ta len ŋgar ambaiŋana na, sombe tutut zin, nako tileŋ la kalŋanda. Mi wal kankaanaŋan ta tizorzooro mi kwon perper sorok na, zin ko tisaana ma tila len.

⁹Tomtom ta so ipa pai kini ma ambai men, na kosasa ko irao be ipasaana kati na som. Tamen zin wal ta tipaŋobŋoobo pa zaala ambaiŋana na, kaimer mbulu kizin ta tikamam ki keŋana na, ko imbot kat mat mi tomtom tiute.

¹⁰Zin wal ta matan iparkinmeete pizin na, kaimer ko tikam mbulu sa mi tikam pataŋana piti. Mi wal kankaanaŋan ta tizorzooro mi kwon perper sorok na, zin ko tisaana ma tila len.

¹¹Sua kizin wal ndeeŋeŋan, ina kembei yok lepeene. Pa iuluulu zin tomtom be timbot ambai. Mi zin wal sananŋan na, tizzwe malmal tabe tikam i som. Titurkewe.

¹²Mbulu ki tuurur koi, ina ikamam ma ŋoŋi imbotmbot la mazwanda. Mi sombe tuurur lelende pizin tomtom, nako matanda mbiriizikaala sanaana kizin, mi takam ŋgar pa mini som.

¹³Zin wal tau tikilaala ŋgar iŋgoi ta ambai ma ilip na, kwon ipiyotyooto ŋgar ambaiŋana men. Mi zin wal ta len ŋgar somŋan na, teene ko ikan zin!

¹⁴Zin wal ta len ŋgar ambaiŋana na, gorgori tirru ŋgar pakan be isala ki. Mi wal kankaanaŋan ta tizorzooro na, molo som to sua sananŋana ta iwedet pa kwon na, ko ipasaana zin.

¹⁵Zin wal ta len koroŋ boozo na, tipase pa pat ma koroŋ kizin be iporoukaala zin pa pataŋana. Mi zin wal sorrokŋan ta len koroŋ som mi timbot ŋoobo na, pataŋana kizin tana ko ipun zin ma tisaana kat.

¹⁶Kadoono ta wal ndeeŋeŋan tikamam pa uraata kizin, ina iuluulu zin be tikam mbotŋana ambaiŋana. Mi kadoono ta wal sananŋan tikamam pa uraata kizin, ina tiwirri sorok pa koroŋ sananŋan men.

¹⁷Tomtom ta so ileŋleŋ la sua pazalŋana, na imbotmbot la zaala ki mbotŋana ambaiŋana kek. Mi zin wal tau tileŋtut sua pazalŋana, nako tiyaaru zin tomtom pakan ma tipaŋoobo pa zaala ambaiŋana.

¹⁸Tomtom ta so iurur koi pu mi ikiskis la leleene, nako kwoono ipakamkaam. Mi tomtom ta so ileŋ sua ŋgalŋana sa mi ila ma izzo pizin wal pakan, na ni tomtom kankaanaŋana.

¹⁹Sombe nu kwom suaŋom, na re u. Pa nu kola kam sanaana. Irao kam som na som. Mi tomtom ta so imborro kat kwoono, na ni tomtom ŋgarŋana.

²⁰Sua ta iwedet pa wal ndeeŋeŋan kwon, ina kembei pat silba ta tomtom lelen pa ilip. Tamen ŋgar ta imbotmbot la wal sananŋan lelen, ina ŋono somŋana.

²¹Sua ta iwedet pa wal ndeeŋeŋan kwon, ina iuluulu tomtom boozomen be timbot ambai. Mi wal kankaanaŋan ta tizorzooro na, tikam kat ŋgar som. Tana kaimer ko timetmeete ma tila len.

²²Kampeŋana ki Yooba, ta ikamam lende koroŋ boozomen. Mi koroŋ ta so ni ikam piti, nako ka pataŋana sa som.

²³Wal kankaanaŋan ta tizorzooro na, sombe lelen iurur pa mbulu sananŋana sa, to ikam zin ma lelen ambai mi menmeen zin. Mi tomtom ta so ŋgar kini ipet kek, na ŋgar ambaiŋana ta ikami ma leleene ambai.