Suão 4:19-51

¹⁹Iwaze ipe niy: — Ikia Deus sohokotsa babata tsimy.

²⁰Katsa tsimypamykysokonaha anaeze hara bete Deus pe “O ikia tsamysapyrẽta” tsimykaranaha. Iwa mydiritsa nihyrikosokdanahatsa nimyhyrinymyrykynaha. Ikiahatsa Sudeutsa tsimypamykysokonaha, nabo Serusarẽhe eze zuba Deus pe. “O ikia tsamysapyrẽta” tsimykaranaha. Aty sa wasani mykara — niy. Iwa atatsa Sesus pe niy.

²¹Niytahi: — Aibani hara bete Deus bo batu tyso “O Deus myzo ikia zuba tsamysapyrẽta” tsimaha. Serusarẽhe eze Deus bo batu tyso. “O Deus myzo ikia zuba tsamysapyrẽta” tsimaha — niy.

²²— Ikiahatsa Samarija ezektsa tsimaha. Deus soho humo ahahyrinymyry byitsa tu ikiahatsa tihi: “O Deus ikia tsamysapyrẽta” tsimykaranaha. Ikiahatsa batu ihumo ahaspirikpo. Katsaktsa Sudeutsa tu. Ihumo myspirikporẽtsa. Deus Sudeutsa nisinyky. Deus bo mymoktyhykta niyzik.

²³Kyze abaka ikiahatsa Deus tyryktsa tsimoziknaha. Iharere bo hyỹ tsimykaranaha. Amy motsasoko anaty hi tsimykaranaha. Wasani tsimaha. Iwaze Deus ahahumo tsakurẽta. Iwa tsimyzurukunaha zeka tsakurẽta — Sesus niy.

²⁴— Deus inurybyita ihyrikoso zuba my. Batu zinynaha. Kytsa Deus humo sakurẽtsa maha zeka wasani mozurukunaha. Hawa wasani zuba motsasokonaha. “O Deus ikia zuba tsamysapyrẽta mykaranaha” — niy.

²⁵Kyze atatsa ipe niy: — Deus myzipehata mywata mybarawy bo mynasik. Kiristu mozumuze ihumo myspirikporẽtsa tsimoziknaha, atahi Deus bo mymyoktyhyryk niy. Ana humo hi kahyrinymyrẽtatsa — niy.

²⁶— Uta hiba Deus zikpehata. Utakta abo mopamykysoko Deus zikpehata my — niy.

²⁷Iwaze babatu zinymyrykynahatsa sidisahawy tuk ziksikizonaha. Sesus atatsa tuk iktsa niahaze paikpa mytsaty nikaranaha. Batu tyso niaha — O Sesus amo sa ituk tsikpamykysoko. Hawa sa ituk tsikykara — iwa batu tyso nikaranaha.

²⁸Niytatsahi taopowysuk zerekik atsoko myzubaha bo niy.

²⁹Myzubaha ezektsa pe niy: — Pany. Maku bo ky niy. Atahi pihik zowy baze nidyhyky. Hawa ha ty ziknakara naha ty kabo nitsasoko. Kiristu Deus zipehata ja iky. Pany ibo ky — niy.

³⁰Yhỹ nikaranaha. Iwatsahi myzubaha ezektsa Sesus bo zumukunaha.

³¹Iwaze batu sibo zukbyize zinymyrykynahatsa hi: — O myhyrinymyrytsa amy ty hauktykta — nikaranaha.

³²— O batu ba. Uta kino meky watu kadisahawy. Ahanyhybara — niy.

³³Zinymyrykynahatsa asa zuba nipamykysokonaha: — Aty kok idisahawy ibo zibykare nikaranaha. Mypapatu kok idisahawy ty ibo nyny niy — nikaranaha.

³⁴Sesus ispe niy: — Pikdisaha zeka kakurẽta my — niy. — Atsawatu kazo harere bo yhỹ my zeka kakurẽta babata mykara. Kazo zikpehatawy iharere humo yhỹ ikykaraze kakurẽta. Iharere nihawatu my zeka kakurẽta mykara kasoroktawa mokuru.

³⁵Ikiahatsa hi: “Napetok napetok nawaze byzoje morahaze kyze arostsa moakuknahaze. Mydisahawytsa mokymynahaze arostsa tahazyzyknaha!” tsimaha. Iwa tsimytsasokonaha. Utakta ahape my: “O batu. Abatu nikymy”. Atsawatu mytsaty tsimykaranaha “O kytsa batu sizuba Sesus humo sispirikporẽtsa maha” tsimaha. Ahape my. Iktsa tsimahaktsa! my. Kytsa asahi kaharere bo hyỹ mykaranaha kahumo sispirikporẽtsa sibo iktsa tsimahaktsa! Abatu kahumo sispirikporẽtsa maha. Ba byri hu tsimaha. Arostsa moakuknahaze tsa watsa abatu kytsa kaharere bo hyỹ mykaranaha kahumo sispirikporẽtsa maha — niy.

³⁶— Maku siriktsa nisiparikik niy. Mektatu arostsa nisizyzykyk niy. Kytsa petoktsa arostsa humo sakurẽtsa. Atsawatu maku kasoho motsasoko, mektatu kasoho humo mysihyrinymyry iwatsahi kytsa kahumo sispirikporẽtsa, ana humo hi kytsa petoktsahatsa sakurẽtsa. Iwatsahi kytsa kahumo sispirikporẽtsa sakurẽtsa hỹ. Asahi nahyrizikponahaze katuk tahawahi mynapykyryknaha ana humo hi sakurẽtsa hỹ — Sesus niy.

³⁷— Estuba maku atazuba mysiparik iwaze maku mektatu mysizozek mykaranaha. Wasani maha.

³⁸Atsawatu estuba maku hi kasoho kino motsasoko mekta tu kytsa kahumo mysihyrinymyrykynaha. Iwatsahi kytsa sizubarẽtsa kahumo sispirikporẽtsa. Kaharere tsimytsasokonaha zeka ana humo hi kytsa kaharere bo hyỹ mykaranaha. Kahumo sispirikporẽtsa zeka mekywatsatu moziknaha. Ustsa kytsa botu kasoho nitsasokonaha iwatsahi siharere humo kaharere bo hyỹ mykaranaha iwaze sispirikporẽtsa moziknaha iwatsahi ahakurẽtsa tsimaha — niy.

³⁹Kyze Sikare ezektsa Sesus bo zumukunaha. Ihumo sispirikporẽtsa. Atatsa harere ziwabynahaze Sesus harere bo hyỹ mykaranaha iwatsahi ihumo sispirikporẽtsa moziknaha. Atatsa nitsasokoze: — Hawa ha ty ziknakara naha ty kabo nitsasoko — atatsa harere ziwabynahaze. Iwatsahi Sesus humo sispirikporẽtsa hỹ.

⁴⁰Iwaze Samarija ezektsa zumukunahaze ipe niaha: — Pany mywahoro bo paku tyny — nikaranaha. Yhỹ niy. Anaeze situk petok zurure.

⁴¹Mektsatu ihumo sispirikporẽtsa. Sibo nitsasokoze myzuba ihumo sispirikporẽtsa.

⁴²Asakino atatsa pe niaha: — Tapara katsaktsa Sesus bo hyỹ tsimaha ihumo myspirikporẽtsa aharere humo tsikykaranaha. Abaka katsa ihumo myspirikporẽtsa iharere humo. Atahi mybarawy ezektsa mysioktyhykta — nikaranaha. Iwa atatsa bo nipamykysokonaha.

⁴³Kyze petok zuruze Sesus Karireja bo ziksizo. Samarija ekzekta niparak Karireja bo niukuru.

⁴⁴Tapara Sesus ziknatsasoko — O Deus sohokotsa tahudikhudikwy ezektsa okzeka iharere bo batu waby zikaha. Utsa kytsa iharere bo piwabyziukunaha, tahudikhudikwy ezektsa batu — Sesus niy:

⁴⁵Kyze Sesus bo zumuze Karireja ezektsa Sesus humo sakurẽtsa nikaranaha. Asahi Serusarẽhe amyikaha bo niaha. Anaeze Sesus bo nikozonaha. Deus hyrikoso ituk mynapykyryk zinynaha. Deus zikwy ituk zinynaha. Iwatsahi sibo zumukuze sakurẽtsa nikaranaha.

⁴⁶Iwaze Kanaã bo ziksizo. Pihik duabohotsa tsik nizukni nahaeze, Kanaã Karireja eze tu niy. Kyze taparakta Kaparanaũ myzubaha ezekta Kanaã eze tu niy. Atahi: — Katse tsimyitsapyrẽta. Asiba zumuzata atahi Kaparanaũ eze nihoeke, asiba nira — niy.

⁴⁷Iwaze kytsa taparakta pe niaha: — Sesus izumu Sudeja iknykta. Karireja bo. Mybo izumu — niaha. Iwaze taparakta Sesus bo zumuze ipe niy: — O Sesus tupakta kawahoro bo tsimy, katse moraka. Pany katse tyzizororowykta! — niy.

⁴⁸Sesus ipe niy: — Kytsa kahumo batu sispirikpo. Tapara Deus zikwy humo piwatawyky. Anabo hi iktsa mykaranahaze iwatsahi kaharere bo hyỹ maha iwaze kahumo sispirikporẽtsa — Sesus niy.

⁴⁹— O pany Sesus! Aidytykta, katse irabyitu — niy.

⁵⁰— Tsiksizokta! Awahoro bo atse botu nizororo. Tsakurẽta niyzik — Sesus niy. Maku Sesus harere bo hyỹ nikara ihumo tispirikporẽta nikara. Iwatahi tawahoro ziksikizo.

⁵¹Atazuba tawahoro bo ziksikirize ske pukteze tu itsumuẽhĩtsitsa zihobyknaha. Ipe niaha: — Atse nizororo. Iwatahi tsakurẽta — nikara.