Stz'ib'en Wa'nch 6:27-37

²⁷K'on kxjoyon te ewe' aj cha a'ox nxik tsi' tanq'in te echi'jel; mejor pe'ejoyon waq te aj nxik sin jun tanq'in etanim te jun-ele'x, aj etanq'in aj otzajel nsi' wetz te Ichan Aj Tk'wa'al Dios a'in tzan tpaj a'in wetz intzaj lajo' tzan te Qtat.»

²⁸Yaji kyetz oxik kcha'o' tetz: «¿Tidi' presis tzan jk'ulun tzan tb'antik qitza' aj tgan te Qtata Dios?»

²⁹Owaj stzaq'b'e' tetz: «Te Qtata Dios tgan tzan etokslan wi'j wetz aj intzaj tlajo'.»

³⁰Oxik kcha'o'ky tetz ikxjani: «¿Tidi' jun lab'al oqtel ak'ulu' tuky'i tajwalil Qtata Dios tzan tok qen qetza b'ix tzan qokslana awi'j? ¿Tidi' nb'antik awitza'?

³¹Kye qijajil oqtxi', kyetz oxik kywa'a' te wab'j mana aj otzaj tsi' te Qtata Dios kyetz tuj te ky'ixk'oj tx'o'tx'. Iktza'x tz'ib'ankaj tuj Tu'jal Qtata Dios ikxjani: “Te Qtata Dios aj atjax tuj ka'j otzaj tsi' te kywe' tzan kywa'an.”»

³²Te Jesus owaj stzaq'b'e' kyetz ikxjani: «Wetz oxe'l nq'uma' etetz b'an b'an'ax, nya'tx a te Moisés nxik sin etetz te wab'j aj tzajnaq tuj ka'j sinoke a te Ntat ntzaj sin te wab'j b'an b'an'ax aj tzajnaq tuj ka'j.

³³Te wab'j aj ntzaj tsi' te Qtata Dios tzajnaq tuj ka'j b'ix nxik tsi' kyanq'in kye xjal twitz tx'o'tx'.»

³⁴Kyetz oxik kyqani' ikxjani: «Tat, tzaj asi' aj wab'jni te qetza.»

³⁵Te Jesus oxik tq'uma' kyetz: «A'in wetz te wab'j aj nxik sin etanq'in. Ab'l aj owokel lapet wi'j nlay tz'ok wa'ij ti'j, b'ix te aj owokslayon wi'j nlay tzaj tzajk'aj ti'j.

³⁶Komo iktza'x ma'tx xik nq'uma', etetz k'onti'l nkx'okslan wi'j anke oje kyin'ok eten.

³⁷Kyaqil aj nkyetzaj tsi' Ntat wetz, nkye'ok lapet wi'j b'ix kye aj nkye'ok lapet wi'j, nlay kye'el wik'o'.