Soukapwüng 7:8-19

⁸Iwe, Kition a tinala ekewe lusun chon Israel ngeni en me lenian, nge ekewe ülüpükü mwän a amwöchüretiu. Ir ätekewe mi angei seni chiener kewe mi liwin pisekir me nöür kewe rappwa. Iwe, lenien ekewe chon Mitian a nom fan lon ewe lemol.

⁹Lon ewe chök pwinin ewe Samol mi Lapalap a üreni Kition, “Kopwe pwätä o feitiu lon lenien chon Mitian pwe kopwe maun ngeniir, pun üpwe föri met kopwe akufuur ren.

¹⁰Nge are ka niuokus le feitiu, Pura noum we chon angang epwe etuketiu.

¹¹Iwe, kopwe rongorong mine repwe üra, mürin kopwe pwora le feitiu o maun ngeni ewe leni.” Mürin, Kition me Pura nöün chon angang ra feitiu ren ewe lenien mamas än ekewe sounfiu.

¹²Iwe, ekewe chon Mitian me chon Amalek, pwal ekewe aramas meinisin seni ötiu ra nom lon ewe lemol, usun epwi pwiin lifichimas ren chomongur. Nge nöür kamel ese lea, pun ra usun chök föün pien aroset.

¹³Lupwen Kition a feito, a rong pwe eman mwän a apworausa ngeni chienan we an tan. A üreni, “Üa eäni eu tan pwe üa küna eföü pilawa seni parli a sokopenelong lon leniach. A küw eu imw mangaku pwe a turutiu o tala.”

¹⁴Nge chienan a üreni, “Ei a pwärätä pwe iei fokun nöün Kition we ketilas, i nöün Joas we mwän, eman re Israel. Esor och wewen lükün. Kot a mwüt ngeni Kition pwe epwe akufu ewe mwicheichen sounfiun Mitian meinisin.”

¹⁵Iwe, lupwen Kition a rong ei tan me wewen, a fel ngeni Kot. Iwe, a liwinla ren lenien chon Israel o üreniir, “Oupwe pwätä, pun ewe Samol mi Lapalap a mwüt ngenikich pwe sipwe akufu ewe mwicheichen sounfiun Mitian.”

¹⁶Iwe, a ineti ekewe ülüpükü mwän lon ülüngat mwich, a pwal ngeniir meinisin rappwa me pör mi pön, nge a wor töl lon ekewe pör.

¹⁷Iwe, a üreniir, “Oupwe nenengeniei o föri usun mine üa föri. Lupwen üpwe tori ororun lenier, oupwe chök föri usun mine üa föri.

¹⁸Lupwen aipwe ettiki nöüm rappwa, äm me chokewe mi etiei, pwal ämi oupwe ettiki nöümi kewe rappwa pwelin ünükün ewe lenien sounfiu o arukak, ‘Fän iten ewe Samol mi Lapalap, pwal fän iten Kition.’”

¹⁹Iwe, Kition me ekewe ipükü mwän mi eti ra tori ororun ewes leni, lupwen fansoun lepoputän aruuen akasiwilin chon mas lukenipwin. Ekewe sounfiu ra chök kärän popuetä le mas. Mürin, ra ettiki nöür kewe rappwa o amökkü ekewe pör mi nom lepöür.