Soũↄ 40:1-16

¹Davidi lɛ.

²Ma wɛdↄ̀ Diizi maamaa, ↄ̃ à ma wɛgwà à ma wiilɛa mà.

³À ma bↄ gbã́o kↄ̃fĩde guu, à ma si dɛɛwa. À ma gbá pɛ̀lɛ gbɛsi musu, à ma zɛ we gíũgiũ.

⁴À lɛ̀ dafu dà ma lɛ́u, wá Lua táasilɛa pↄ́ ũ. Gbɛ̃́ↄ e dasi, vĩa i ń kṹ, aai Dii náaikɛ.

⁵Báaaden gbɛ̃́ pↄ́ Dii náai vĩ mɛ́ ìli zɛ ń waladeↄ ń tã́agbagbanaↄo ũ.

⁶Dii ma Lua, n yãbↄnsaɛkɛaↄ dasi, wa fↄ̃ yã́ pↄ́ ńlɛ yáwanↄↄ dↄdↄo. Tó má dàu lɛ́ siunɛ́, a lɛ́ vĩo, má fↄ̃ o píio.

⁷Ń ye sa'obↄ ge gbaio, ↄ̃ ń tò ma swã́ mà. Ni sa pↄ́ wì a pↄ́ kátɛu à tɛ́kũ ge duun awakpabↄ gbɛao.

⁸Ɔ̃ ma mɛ̀: Má kɛ́! Lá a ku lá guu ma yã́ musuwa.

⁹Má ye n pↄeã kɛaiɛ, ma Lua, n ikoyã ku ma sↄ̃ guu.

¹⁰Má yã́zɛde baokpa balu guu, má a lɛ́ kpaaũo lá ń dↄ̃wà Dii.

¹¹Lá ni yãnakpámá, má nílɛo, má n náai ń n gbɛ̃suabaao yã'o. Má gí n gbɛ̃kɛ ń n sĩandekɛo oi balu guuo.

¹²Dii, ńsu gí ma wɛ̃nagwaio, to n gbɛ̃kɛ ń n sĩandekɛo ma dↄ̃́a.

¹³Asa vãi pↄ́ liaamazi lɛ́ vĩo, ma tàaeↄ dàmala, má fↄ̃ gu'eo, a dasi dɛ ma mikãa, sↄ̃ kɛ̃̀magu.

¹⁴Dii, suɛ, ma misi, Dii, kɛ kpakpa, mↄ dↄmalɛ.

¹⁵To wí ma wɛnaↄ kṹ, aa ń mi pɛlɛ. To gbɛ̃́ pↄ́ ye mà yã'eↄ kpɛkpa, an gɛɛ gↄ̃ kpá ń wɛ́i.

¹⁶Gbɛ̃́ pↄ́ aaì omɛɛ, tàalɛ, tàalɛↄ, to wí gↄ̃ ń ú ũ.