Soũↄ 37:8-39 - Bibeli Luayãtaalá

Soũↄ 37:8-39

Click on verse(s) to share them!

⁸Pↄkũma tó, mikɛ̃ pↄpaawa. Ńsu to yã́ lí n kũ gbãao, ì mↄ́ ń vãikɛaoɛ.

⁹Asa gbɛ̃vãiↄ midɛ, gbɛ̃́ pↄ́ an wɛ́ dↄ Diiziↄ mɛ́ aa gↄ̃ bùsu vĩ.

¹⁰À gↄ̃̀ yↄↄ kɛ́ gbɛ̃vãiↄ aaↄ ku lↄo, baa tó n ń wɛɛlɛ, ńyↄ̃ ń eo.

¹¹Zĩabusanaↄ mɛ́ aaↄ bùsu vĩ, aaiↄ pↄnakɛò ń aafia zↄ̃ↄo.

¹²Gbɛ̃vãi ì vãikpaaĩ ń gbɛ̃maao, ì lɛ́sakãaàzi.

¹³Ãma Dii ìↄ aà yáalↄ, asa a dↄ̃ aà gↄↄ a pa.

¹⁴Gbɛ̃vãiↄ ì fɛ̃nda wo, aaì ń kakpa sáa, kɛ́ aa e taasideↄ ń wɛ̃nadeↄ kwɛò, aai gbɛ̃́ pↄ́ an yãkɛa maaↄ dɛdɛ.

¹⁵An zĩa fɛ̃nda a ń zↄ̃ ń sↄ̃u, wa ń sáↄ ɛ́'ɛnɛ́.

¹⁶Yↄↄna pↄ́ gbɛ̃maa vĩ dɛ gbɛ̃vãi dasiↄ àizɛɛa.

¹⁷Asa gbɛ̃vãiↄ gbãa a midɛ, ãma Dii ìↄ gbɛ̃maaↄ kũa.

¹⁸Dii tàaesaideↄ yã́ dↄ̃, an kpaalɛ ìↄ dɛ ń pↄ́ ũ gↄↄpiiɛ.

¹⁹Wí a ń kṹ yãpãsĩgↄↄo, baa tó nↄana kà, aaↄ kãaɛ.

²⁰Ãma gaga a gɛ̃ gbɛ̃vãiↄgu, Dii ibɛɛↄ láa lá sɛ̃̀bↄlↄ ì láawa, aa gɛ̃lɛ lán súɛlɛwa.

²¹Gbɛ̃vãi ì pↄ́ sɛ̃amá, ìli a fĩaboo, gbɛ̃maa sↄ̃ ì gbada sↄũsↄũ.

²²Gbɛ̃́ pↄ́ Dii báaadàńguↄ mɛ́ aa gↄ̃ bùsu vĩ, gbɛ̃́ pↄ́ à lɛkɛ̀nɛ́ↄ sↄ̃ aa midɛ.

²³Dii mɛ́ ì zɛmikũ gbɛ̃́ɛ, aà pↄ ìↄ na aà kuawa.

²⁴Baa tó àlɛ lɛlɛ, a lɛ́lɛ sↄlↄlↄo, kɛ́ Dii aà kũa yã́i.

²⁵Ɛ̀waason ma ũ yãa, ↄ̃ ma zikũ̀, mi e Lua gbɛ̃maa vũ̀aa bauo, mi e aà nɛ́ↄ lɛ́ baakɛo.

²⁶Ìↄ gbada gↄↄpii ìↄ pↄ́ sɛ̃anɛ́, aà nɛ́ↄ aaↄ dɛ báaadeↄ ũɛ.

²⁷Mikɛ̃ yãvãiwa, níↄ yãmaakɛ, ní e ǹyↄ̃ ku gↄↄpii.

²⁸Asa Dii ye maakɛai, a a náaikɛnaↄ vũaao. Aaↄ ku aafiaɛ gↄↄpii, gbɛ̃vãiↄ sↄ̃ aa midɛ.

²⁹Gbɛ̃maaↄ mɛ́ aa gↄ̃ bùsu vĩ, aaiↄ ku we gↄↄpii.

³⁰Ɔ̃nↄyã ì bↄ gbɛ̃maa lɛ́u, aà lɛ́ ì yã́zɛde o.

³¹Aà Lua ikoyã dↄ aà sↄ̃wa, aà gbá lí tii pↄewao.

³²Gbɛ̃vãi ì gbɛ̃maa kpákpa kɛ́ à e aà dɛ.

³³Dii a gbɛ̃maapi to aà ↄzĩo, a we yã́kpalɛ aà bleo.

³⁴Sↄ̃́a Diizi, níↄ aà yã́ kũa, i n kã́fĩ, ní gↄ̃ bùsu vĩ, ní gbɛ̃vãiↄ midɛa e.

³⁵Ma gbɛ̃vãi gbãadee è yãa, àlɛ ↄta lán lí pↄ́ gu kɛ̀ɛ̀ nawa.

³⁶Kɛ́ tá ma kpa we, a ku we lↄo, ma aà wɛ̀ɛlɛ, mi aà eo.

³⁷Tàaesaide yã́ gwa, wɛ́tɛ gbɛ̃maa yã́i, asa nↄ̀sɛniɛde buiↄ gↄ̃ bui ũ.

³⁸Ãma duunkɛnaↄ bãdɛ sãnusãnu, gbɛ̃vãiↄ bui a midɛ.

³⁹Dii mɛ́ a gbɛ̃maaↄ suaba, aↄ dɛnɛ́ ulɛkĩi ũ taasikɛgↄↄ.