Solomon 8:5-14

⁵Hentei ves heini is ebpekeuma he ebpuun te sibsivayan he edsandig diyà te minahal zin? Bahi Mibpukew ku is gehinawa nu zutun te ziyè ki te sihung te mensanas, he zutun ka meetew.

⁶Kenè ke en mahal te zuma, kekenà, iyan e zà kenikew mahala. Kenè ke en kepkep te zuma, kekenà, iyan e zà kenikew kepkepi. Su is kebmahal, iring is gehem din te kemetayen; is keinit te egkeǥezam ta ne kenà egkeeǥen iring te kebpekeuma te kemetayen. Is kebmahal iring te egkeregreg wey edriyubriyub he hapuy.

⁷Kenà heini egkeevukan minsan ebusbusan te zekelà he wahig. Minsan delemi pa heini ne kenà gihapun egkeevukan. Kenà heini egkepemasa minsan ivayad pa te etew is langun he ketiǥeyunan din.

⁸Duen dey etevey he vetan-en pa su ebpemiyesungan pa. Emun duen ebpengulitawu kandin hengkey is ebeelan dey?

⁹Nehilevetan en man sikandin etawa wazè pa ne edipinsahan dey sikandin.

¹⁰Wazè e pa mehileveti ne is menge susu ku henduen be te menge turi. Ne kuntintu is minahal ku kediey.

¹¹Si Solomon, duen din pemuleey te paras diyà te Baal Hamon he mibpeseupan din te menge perevasuk dutun. Is kada sevaha kandan mibeǥey ziyà te ki Solomon te 1,000 he vuuk he pelata he iyan bahin ni Solomon te bali te pruduktu zutun te pemuleey.

¹²Bayèbayè ka, Solomon, emun is bahin nu 1,000 he vuuk he pelata ne is bahin te menge perevasuk nu 200 he vuuk he pelata. Piru ebeyveyaan ku zaan is kediey he egkesuatan mehitenged te pemuleey ku.

¹³Ipezineg nu kedì is laǥeng nu, pelanggè ku, iring te ebpemineg daan te laǥeng nu is menge emiǥu nu guntaan te keniyan kew te pemuleey edhiphipanew.

¹⁴Gaanggaan ka hendini te kediey, pelanggè ku, he iring keǥaan te selazeng he edlinglingketew ziyà te menge vuntud he neeneb te menge pinemula he ebeelan he pehemut.