Solomon 6:1-13

¹Nage gasa sawi yai we, tama nago tigidali we aiyaba elaluali. Nago abagi wali bidi mena paliwe? Dago nage tau selama, aga gegaibao. Tiali goli, aga mena sunumidu wali paliwe?

²Eno abagi wali bidi aga giba pali. Te gide te wiegi yai denami ebo nai dabe pągąnąlubao. Te aga meme dabego te nosai dabe tubo sę eyu, tama agai te au sawia pai plaua dabe sisinibo sę eyu ebao.

³Te aga eno bidi da, tama ena agai we dao. Agai aga meme kibu dabe te sawi wiegi yai plaua dabe tomoba sela pelama, tama te meme dabe augwa te nosai tubo sę eyu bidibao.

⁴Eno abagi, nage gasa sawi yai mu da, te wiegi yai taun si Tirsa me Jerusalem tiwai da. Eno suali, nage gasa sawi yai mu yaibaso, tama eno homu dąų wali, te bidigo te ami bidi genuai hani te ugwa plak dali asobo subaso, agai gedu tede dąų wabo tiwai yali.

⁵Eno homugo nago enaba tonogi homu yali. Nago enaba tonobaso da, te ena nagede mu tulalubo dao. Nago gesabidiba hauwagasai elalubo tobolu nisi te kibu meme hani wiegi yai pemene eyu, te Gileat bulu du dabedu aiyaba sasa mano dulubo tiwai ebao.

⁶Nago kele dabe tedela mu yali, te augwaligo megi tama ąį paluai tedela sipsipgo tigi nisi tiwai yali. Nago kele deli me degebeo. Menio. Tigidali bugagia mu elalubo dao.

⁷Name ugwago nago gesabidi mesega sali goli, tialima eno nago gesabidi ula ebo suali.

⁸Kingo we hauwa elalubao. Bidi sese sela 60 we te kwin bidibao, te tudi badu si wali daganaluali we dabe te bidi sese me si me si 80 bidibao. Agai te gasa gesi we dabe hauwa me elalubao.

⁹Tiali goli, ena da, eno abagi deli naga elalubao. Aga te polalubo mu bidibaso, tama eno aga godolo mu ebao. Aga idago aga deli naga ame neyu, tama agade wiegi yai pemene eyu, tama aga godolo mu ebo dao. Tigidali gesi wegigo aga sulama, te augwaligo aga nogi ugaba sali. Te kwin we dabego, me te kingo gasa we dabego te balia po weyu, te agaba wiegi yai pemene yali.

¹⁰Dego mu enaba tononalubo dawe? Agai gesabidi te giliga pedelainu ebo tiwai elama, te giliga ula genuai nanobo tiwai eyu, tama agai gesabidi mu udula pali, te polua ula tiwai yali. Eno aga sulama, tama eno homu dąų wali, te bidigo genuai ami hani te augwa plak dali asobaso sulama ebo tiwai yalio.

¹¹Ena dulama, tama ena te du wiegi yai walobo ni dabe elalubo giba asali. Ena asali, te gesi kulubi dabe te ni dabede te bulu odogode holobo sueinogo asali. Eno te ni waingo gesi kulubi dabe, me te nai du walali wiegi yai elalubo te eno sueinu yali.

¹²Eno abagi we, eno nage sulama, ena noma sali. Eno kone palali, ena te genuai bidi mu deligo karisde bidibo tiwai yalio.

¹³Sulam we, ma asao, ma asao. Dago nage suainogo, nage geasa ma asao. Te eno bidi dabe gedude bebegelibo danis ebo, te magi baso dagego ena suabo homu ebawe?