Solomon 5:1-13

¹Meri bilong mi, yu lewa tru bilong mi, mi kam pinis long gaden bilong mi. Na mi bungim ol samting i gat gutpela smel. Mi kaikai gutpela hani. Na mi dring susu na wain bilong mi. Ol meri i singim song olsem Yutupela gutpela pren tru, yutupela kaikai na dring inap yutupela i pulap tru.

²Long nait mi slip i stap tasol mi wok long tingting yet. Na mi driman na mi lukim man bilong mi i paitim dua bilong haus bilong mi. Yangpela man i singim song olsem Meri bilong mi na lewa tru bilong mi, yu opim dua na larim mi i kam insait. Wara bilong nait i kam daun na wasim het bilong mi. Na wara i pulap long gras bilong mi.

³Mi rausim pinis klos bilong mi, na mi les long putim klos gen. Mi wasim pinis lek bilong mi na mi les long kirap wokabaut na mekim lek i doti gen.

⁴Tasol mi harim pren bilong mi i holim handel bilong dua, na bel bilong mi i kirap na mi amamas.

⁵Mi kirap bilong opim dua. Mi putim han long handel bilong dua na sanda i stap long han bilong mi i pas long handel bilong dua.

⁶Mi opim dua long pren bilong mi. Tasol em i go pinis na mi no lukim em. Mi tingim toktok bilong en na bel bilong mi i nogut tru. Na mi wok long painim em, tasol mi no lukim em. Mi singautim em tasol em i no bekim singaut bilong mi.

⁷Ol wasman bilong banis bilong taun i lukim mi. Na ol i paitim mi na bagarapim skin bilong mi, na ol i kisim saket bilong mi.

⁸Ol meri bilong Jerusalem, sapos yupela i lukim pren bilong mi, yupela i mas promis long tokim em olsem, mi laikim em tumas na bun bilong mi i slek.

⁹Yu naispela meri na yu winim olgeta meri. Dispela man bilong yu em i wanem kain man? Ating em i winim man bilong mipela ol arapela meri na yu laik bai mipela i mekim promis olsem?

¹⁰Pren bilong mi em i strongpela man na pes bilong en i naispela tru, na i winim pes bilong planti tausen man.

¹¹Pes bilong en i lait olsem gol. Gras bilong en i gutpela tumas na i blakpela tru olsem gras bilong blakpela pisin.

¹²Ai bilong en i lait tumas olsem gras bilong pisin i waswas pinis na i sanap arere long wara.

¹³Gras long wasket bilong en i gutpela olsem gaden i pulap long ol samting i gat gutpela smel. Maus bilong en i olsem naispela plaua. Toktok bilong en i gutpela tumas olsem sanda i gat gutpela smel.