Solomon 2:1-8

¹Tasol mi olsem wanpela plaua bilong bus i kamap long ples stret bilong Saron. Na mi olsem naispela plaua i stap long ples daun namel long ol maunten.

²Pren bilong mi i stap namel long ol arapela meri olsem plaua i stap namel long ol gras i gat nil.

³Pren bilong mi i stap namel long ol arapela man olsem wanpela diwai i gat gutpela kaikai i stap namel long ol arapela diwai long bus. Long taim bilong biksan mi laikim tumas long sindaun long as bilong dispela diwai. Pikinini bilong dispela diwai i gutpela tumas na i swit tru long maus bilong mi.

⁴Em i kisim mi i go long bikpela kaikai long bikpela haus bilong en. Em i laikim mi tumas na mi amamas long em olsem mi amamas long gutpela laplap i bilasim haus kaikai.

⁵Pren bilong mi, mi laikim yu tumas, na bun bilong mi i slek. Plis, yupela i mas givim mi ol pikinini bilong diwai, na ol pikinini bilong wain ol i bin mekim drai. Na bai mi kaikai na kisim strong.

⁶Pren bilong mi i putim han kais bilong en aninit long het bilong mi. Na long han sut bilong en, em i holim bodi bilong mi.

⁷Ol meri bilong Jerusalem, yupela i mas ting long ol gutpela wel abus na mekim strongpela promis long mi, bai yupela i no ken kirapim bel bilong mitupela. Dispela i samting bilong mitupela yet.

⁸Pren bilong mi i kam long mi. Em i kalap kalap na i ran i kam antap long ol maunten na mi harim nek bilong en.