Solomon 1:5-14

⁵Dage Jerusalem we dabego, odao. Eno tigi husugu yali, tiali goli ena sawi yai pai mu da. Eno tigi husugu yali, te Kedar dabego wa pai bulude te sel ugwa be dabe husugu yai tiwai dao. Tiali goli, ena gasa sawi yai mu, te sawi yai name ugwa dabe te king Solomongo bede walalubo tiwai dao.

⁶Mu tama, eno tigi husugu yali, tiali goli dagego homugo ena te olo sę ebo we tiwai da homu elamuo. Giliga ena tigide dolama, tama eno tigi te tiwai pedelali. Te eno abe dedego ena dali wado po obaso, tama ena te wain gi dabe tonalugi pabo sę idualio. Tama tialigo eno tigi ena digi bugagia tonalusąwani.

⁷Nage wiegi yai abagi da, eno nage godolo mu ebao. Te nago naga sipsip kibu dabe menaba odasa paibawe? Te augwali mena badu pedaiba pelama, te tuabo wiegi yai nosai gegegi paibawe? Te genuai giliga nanobode augwali menaba tiwai madi duala sigi pogowe? Nago enabolo obaso da, te eno nage gegebo sę dene me egobeo. Te nago enabolo wasiąbaso da, teda eno nage eno te gasa sipsip tonalubo bidi dabe tomode gegebo sę eyu da, augwaligo ena te penani ebo we da homu yaibao.

⁸Eno abagio, nage gasa sawi yai we mu da. Te nago ena suabo homu ebaso da, teda nago te sipsip dabego sągą pasalu wali poanao. Nago wali pobaso da, teda naga meme dabego tuabo wiegi yai nosai elalubo sueibao. Te nosai te sipsip tonalubo bidi dabego sel ugwa be pąde elalubao.

⁹Ae, nage eno sawi yai abagi da, nago au yali wiegi yai da, te Isip king bidigo karis dabe kekebo hos kibu dabe au yali tiwai dao.

¹⁰Nago tobolu niside gedelali au dobagego te nago gesabidi ula ilali. Tama nago magede domoani wiegi yai beli dabego te nago magede ula mu elalubao.

¹¹Tialima, dago te golgo au dobage meba nigiyu, te gasa au dobage dabe te silvago nigibadi elama, tama dago nagebolo mawaibao.

¹²Eno king bidi aga betide pila muyu, tama agai eno au yali wiegi yai sanda denami odobao.

¹³Eno abagi, eno godolo mu ebao, pauda me deli wiegi yai denami ebo tiwai ebaso, te ena baude ugadu pila mubao.

¹⁴Tama aga te wiegi yai denami ebo plaua dabe tiwai elalubaso, te Engedi wain gi dabe pedalubo tiwai ebo dao.