Soakas 8:8-24

⁸Ma nukewa nga fahk uh pwaye, Wangin kutena ma sesuwos ku mwe kiapu mwet.

⁹Nu sin mwet liyaten uh, ma inge nukewa kalem, Ac nu selos su oasr etauk la, fisrasr elos in kalem kac.

¹⁰Sulela kas in luti luk liki na silver; Sulela etauk liki na in eis gold nasnas.

¹¹“Nga pa Lalmwetmet. Nga wo liki mwe naweyuk uh; Wangin ma kom lungse ac ku in lumweyuk nu sik.

¹²Nga Lalmwetmet ac liyaten; Oasr etauk ac nunak suwohs in nga.

¹³Elos nukewa su akfulatye LEUM GOD elos kwase ma koluk. Nga srunga inse fulat ac filang, Oayapa inkanek koluk ac kas kikiap.

¹⁴Nga orek pwapa, ac nga akfahsrye. Oasr ku ac etauk yuruk.

¹⁵Nga kasru tokosra uh in leumi mwet uh, Ac nga kasru mwet kol in oru ma sap suwohs.

¹⁶Mwet kol nukewa faclu leumi mwet uh ke kasru luk — Fisrak ac mwet leum fin faclu oana sie.

¹⁷Nga lungse elos nukewa su lungse nga; Kutena mwet su sukyu, ku in koneyuyak.

¹⁸Oasr mwe kasrup ac sunak, Wo ouiya ac kapkapak yuruk in kitala.

¹⁹Ma kom ac eis sik uh saok liki gold ma wo emeet, Ac wo liki pac silver ma arulana nasnas.

²⁰Nga fufahsryesr ke inkanek suwoswos; Nga fahsr tukun inkanek lun nununku suwohs.

²¹Nga sang mwe kasrup nu selos su lungse nga, Ac nwakla lohm selos ke ma saok.

²²“LEUM GOD El oreyula meet liki ma nukewa, Orekma se emeet lal in pacl loeloes somla.

²³Orekla nga ke mutaweyen ma nukewa, Meet liki na orekla faclu.

²⁴Nga isusla meet liki oasr meoa, Pacl ma soenna oasr unon in kof.