Soakas 8:23-36

²³Orekla nga ke mutaweyen ma nukewa, Meet liki na orekla faclu.

²⁴Nga isusla meet liki oasr meoa, Pacl ma soenna oasr unon in kof.

²⁵Nga isusla meet liki oasr fineol uh, Meet liki tohktok uh oakiyuki,

²⁶Meet liki na ke God El orala faclu, ku inima we — Soenna oasr kutkut srisrik lun infohk uh.

²⁷Nga oasr we ke El oakiya ma oan inkusrao, Ac ke El asroelik pekusra uh fin meoa,

²⁸Ke pacl se el filiya pukunyeng yen engyengu, Ke El ikasla unon in kof in meoa,

²⁹Ac ke El sapkin tuh kof in meoa uh in tia alukela srikasrak ma El oakiya. Nga muta we ke El oakiya pwelung loangeyen faclu.

³⁰Nga muta siskal oana sie mwet lemlem nu ke musa. Len nukewa nga mwe engan nu sel, Ac nga engan ye mutal pacl nukewa —

³¹Nga engan ke faclu, Ac ke mwet su muta fin faclu.

³²“Ke ma inge, tulik nutik, lohngyu inge. Oru oana ke nga fahk, ac kowos ac fah insewowo.

³³Lohng ma lutiyuk kowos kac, Aklalmwetmetye kowos, ac tia pilesru.

³⁴Insewowo mwet se su muta ke mutunoa sik len nukewa, Ac soano in lohngyu ke nien utyak nu inkul sik.

³⁵Mwet se su koneyuyak el konauk moul, Ac LEUM GOD El ac fah insewowo sel.

³⁶Mwet se su tia koneyuyak el sifacna kunausulla; Kutena mwet su srungayu, lungse misa.”