Soakas 8:15-32

¹⁵Nga kasru tokosra uh in leumi mwet uh, Ac nga kasru mwet kol in oru ma sap suwohs.

¹⁶Mwet kol nukewa faclu leumi mwet uh ke kasru luk — Fisrak ac mwet leum fin faclu oana sie.

¹⁷Nga lungse elos nukewa su lungse nga; Kutena mwet su sukyu, ku in koneyuyak.

¹⁸Oasr mwe kasrup ac sunak, Wo ouiya ac kapkapak yuruk in kitala.

¹⁹Ma kom ac eis sik uh saok liki gold ma wo emeet, Ac wo liki pac silver ma arulana nasnas.

²⁰Nga fufahsryesr ke inkanek suwoswos; Nga fahsr tukun inkanek lun nununku suwohs.

²¹Nga sang mwe kasrup nu selos su lungse nga, Ac nwakla lohm selos ke ma saok.

²²“LEUM GOD El oreyula meet liki ma nukewa, Orekma se emeet lal in pacl loeloes somla.

²³Orekla nga ke mutaweyen ma nukewa, Meet liki na orekla faclu.

²⁴Nga isusla meet liki oasr meoa, Pacl ma soenna oasr unon in kof.

²⁵Nga isusla meet liki oasr fineol uh, Meet liki tohktok uh oakiyuki,

²⁶Meet liki na ke God El orala faclu, ku inima we — Soenna oasr kutkut srisrik lun infohk uh.

²⁷Nga oasr we ke El oakiya ma oan inkusrao, Ac ke El asroelik pekusra uh fin meoa,

²⁸Ke pacl se el filiya pukunyeng yen engyengu, Ke El ikasla unon in kof in meoa,

²⁹Ac ke El sapkin tuh kof in meoa uh in tia alukela srikasrak ma El oakiya. Nga muta we ke El oakiya pwelung loangeyen faclu.

³⁰Nga muta siskal oana sie mwet lemlem nu ke musa. Len nukewa nga mwe engan nu sel, Ac nga engan ye mutal pacl nukewa —

³¹Nga engan ke faclu, Ac ke mwet su muta fin faclu.

³²“Ke ma inge, tulik nutik, lohngyu inge. Oru oana ke nga fahk, ac kowos ac fah insewowo.