Soakas 8:1-15

¹Lohng! Lalmwetmet el wowoyak. Etauk el oru pusracl in lohngyuk.

²El tu fin tohktok uh sisken inkanek, Ac yen inkanek uh osun we.

³Ke nien utyak nu in siti uh Sisken mutunoa el pang ac fahk:

⁴“Nga kwafe suwos nukewa; Nga pang nu sin mwet nukewa faclu.

⁵Kowos su srakna elahn tulik, oru kowos in elahn mwet matu. Ya kowos lalfon? Lutlut in oasr etauk lowos.

⁶Lohng kas wolana luk. Ma nukewa nga fahk uh suwohs.

⁷Kas nukewa luk pwayena; Kas kikiap uh mwe srungayuk sik.

⁸Ma nukewa nga fahk uh pwaye, Wangin kutena ma sesuwos ku mwe kiapu mwet.

⁹Nu sin mwet liyaten uh, ma inge nukewa kalem, Ac nu selos su oasr etauk la, fisrasr elos in kalem kac.

¹⁰Sulela kas in luti luk liki na silver; Sulela etauk liki na in eis gold nasnas.

¹¹“Nga pa Lalmwetmet. Nga wo liki mwe naweyuk uh; Wangin ma kom lungse ac ku in lumweyuk nu sik.

¹²Nga Lalmwetmet ac liyaten; Oasr etauk ac nunak suwohs in nga.

¹³Elos nukewa su akfulatye LEUM GOD elos kwase ma koluk. Nga srunga inse fulat ac filang, Oayapa inkanek koluk ac kas kikiap.

¹⁴Nga orek pwapa, ac nga akfahsrye. Oasr ku ac etauk yuruk.

¹⁵Nga kasru tokosra uh in leumi mwet uh, Ac nga kasru mwet kol in oru ma sap suwohs.