Soakas 7:1-15

¹Wen nutik, esam kas luk nu sum, ac nimet mulkunla ma nga fahk kom in oru.

²Oru ma nga fahk nu sum ac kom fah moul. Kom in karinganang mwe luti luk oana ma se ma saok oemeet sum.

³Sruokya mwe luti luk in wi kom pacl nukewa. Simusla insiom.

⁴Oru lalmwetmet uh in oana sie tamtael lom, ac etauk in oana mwet kawuk fototo lom.

⁵Ma inge ac sruokkomi liki mutan payuk kien mukul saya, ac kas in akmunas lalos.

⁶Sie pacl ah ke nga tuh ngetla ke winto in lohm sik ah,

⁷nga liye kutu mukul fusr su soenna oasr etauk la, na nga akilen sie selos su lalfon lumahl.

⁸El fahsr inkanek ah, apkuranyang nu ke lohm sin sie mutan.

⁹Ke ekela tukun lohsrani acn uh,

¹⁰mutan sac osun nu sel. El nuknuk oana sie mutan kosro su eis molin kosro lal, ac oasr nunak koluk se sel.

¹¹El sie mutan ku nunak lal ac sumwekin, su lungsena forfor inkanek uh pacl nukewa,

¹²ku muta soano mwet ke sruwasrik inkanek uh. Kutu pacl uh el ac tu inkanek uh, ac kutu pacl ke nien kuka.

¹³El kaokma mukul fusr sac ac ngok mutal. El ngetang suilya ac fahk,

¹⁴“Nga oru tari mwe kisa luk misenge, ac ikwa kac uh oasr yuruk.

¹⁵Na nga tuku suk kom mweyen nga ke osun nu sum, na pa nga sun kom.