Soakas 4:6-27

⁶Nimet sisla lalmwetmet, na el ac loangekom. Lungse el, ac el fah liyekomyang wo.

⁷Ma se ma yohk sripa emeet nu sum pa in suk lalmwetmet. Kutena ma kom ac sifil suk saya, kom in suk etauk.

⁸Lungse lalmwetmet, ac el ac fah oru kom in fulat. Apsilya ku, ac el ac fah oru in kaksakinyuk kom.

⁹El ac fah oana sie tefuro wolana nu fin sifom.”

¹⁰Lohngyu, tulik nutik. Nunku akwoye ma nga fahk nu sum uh, na ac fah loes moul lom.

¹¹Nga luti nu sum lalmwetmet ac ouiyen moul pwaye kom in fahsr kac.

¹²Wangin ma ac kosrala inkanek lom kom fin fahsr in lalmwetmet, ac kom ac tia tukulkul ke pacl kom kasrusr.

¹³Esam ma kom luti uh pacl nukewa. Lutlut lom uh pa moul lom — liyaung akwoya.

¹⁴Nimet fahsr nu yen mwet koluk uh fahsr nu we. Nimet ukwe ouiyen moul lalos.

¹⁵Fahsr liki ma koluk! Nimet apkuranyang nu kac! Kuhfla liki ac fahsrot ke inkanek lom.

¹⁶Mwet koluk uh tia ku in motulla nwe ke na elos orala sie ma koluk. Elos ac ngetnget na elos fin tia orala mwe lokoalok nu sin mwet.

¹⁷Ma koluk ac sulallal uh oana mwe mongo ac mwe nim nu selos.

¹⁸Inkanek lun mwet suwoswos uh oana takak lun faht uh, ma kais kutu kalmwelik nwe ke na lenelik.

¹⁹Inkanek lun mwet koluk uh lohsr matoltol. Elos ikori tuh elos tia ku in liye lah mea se oru elos ikori uh.

²⁰Tulik nutik, lohng akwoya ma nga fahk uh.

²¹Esam kas luk ac karinganang in tia wanginla liki kom.

²²Kas inge ac sang moul ac ku lun mano nu sin kutena mwet su kalem kac.

²³Arulana karinganang nunak lom an — mweyen moul lom ac sikyak oana ma kom nunku.

²⁴Nimet fahk kutena ma su tia pwaye, ac tia orekmakin kas kikiap ku kutena ouiya ma ac kiapu mwet uh.

²⁵Ngetot suwohs nu meeto ke inse pulaik. Nimet ngetnget in tonong.

²⁶Akola akwoye ma kom ac oru an, na ma nukewa kom oru ac ku in orekla wo.

²⁷Kaingkin ma koluk ac fahsr suwohs nu meeto. Nimet kuhfla liki inkanek pwaye.