Soakas 3:6-22

⁶Esam LEUM GOD in ma nukewa kom oru, ac El ac fah akkalemye inkanek suwohs nu sum.

⁷Nimet sifacna nunku mu kom arulana fas in lalmwetmet lom; akos LEUM GOD ac fahsr liki ma koluk.

⁸Kom fin oru ouinge, ac fah akkeye monum, ac sot ku nu sum.

⁹Akfulatye LEUM GOD ke mwe sang lom nu sel ke mwe kasrup lom, ac ke fahko se meet ke ima lom.

¹⁰Kom fin oru ouinge, nien filma lom ac fah nwanala ke wheat, ac nien wain lom ac fah kahkkakla ke wain.

¹¹Tulik nutik, nimet pilesru kas in kai lun LEUM GOD nu sum, a lohang nu kac ac eis mu mwe sensenkakin kom.

¹²LEUM GOD El kaelos su El lungse, oana ke sie papa kai tulik su el insewowo kac.

¹³Insewowo mwet se su konauk lalmwetmet, ac su sun etauk.

¹⁴Ma laesla kac yohk liki ma laesla ke silver, ac yohk sripa nu sum liki gold.

¹⁵Lalmwetmet el saok liki wek saok. Wangin kutena ma kom lungse ku in lumweyuk nu kac.

¹⁶Lalmwetmet uh ac akloesye moul lom, akkasrupye kom, ac oru in sunakinyuk kom.

¹⁷Inkanek lun lalmwetmet uh ac mwe engan nu sum, ac kol kom nu ke moul in misla.

¹⁸Lalmwetmet uh oana sak in moul nu selos su eisal, ac mwe insewowo nu selos su akfulatyal.

¹⁹LEUM GOD El orala faclu ke lalmwetmet lal, Ke etu lal El oakiya ma oan inkusrao.

²⁰Lalmwetmet lal uh oru kof ye faclu in unonak, Ac pukunyeng uh in kahkunma af nu fin faclu.

²¹Tulik nutik, sruokya ku liyaten, ac lohang in wo nu ke ma kom oru.

²²Ma inge ac sot moul wo ac insewowo nu sum.