Soakas 2:1-17

¹Tulik nutik, lutlut ke ma nga luti nu sum, ac tia mulkunla ma nga fahk kom in oru.

²Lohng kas in lalmwetmet, ac srike kom in kalem kac.

³Aok, ngisre in oasr etauk lom, ac kwafe tuh kom in liyaten.

⁴Suk aklohya, in oana ke kom ac suk silver ku kutu ma saok su oan wikla.

⁵Kom fin oru ouinge na kom fah etu lah mea kalmen sangeng sin LEUM GOD, ac konauk in etu ke God.

⁶LEUM GOD pa ase lalmwetmet; etauk ac kalem tuku sel me.

⁷El sang kasru nu sin mwet suwohs, ac El karinganang mwet moul pwaye.

⁸El karinganulos su oru wo nu sin mwet ngia, ac taranulos su inse pwaye nu sel.

⁹Kom fin porongeyu, kom ac etu ma pwaye, suwohs, ac wo. Na kom ac etu lah mea fal kom in oru.

¹⁰Kom ac lalmwetmet, ac etauk lom ac fah mwe insewowo nu sum.

¹¹Liyaten ac kalem lom ac loangekom —

¹²ac sruokkomi kom in tia oru ma sutuu. Ma inge ac fah srikomla liki mwet su purakak lokoalok ke kas lalos —

¹³mwet su fahsr liki moul suwohs, ac som nu ke moul in lohsr,

¹⁴mwet su engan in oru ma koluk, ac insewowokin moul lusrongten ac sesuwos,

¹⁵mwet kutasrik su tia ku in lulalfongiyuk.

¹⁶Kom ac fah ku in kaingkunla kutena mutan koluk su ac srike in srife kom ke kas emwem lal,

¹⁷su tia pwaye nu sin mukul tumal, ac tia esam wuleang el oru ye mutun God.