Soakas 23:14-35

¹⁴a ma ac molela moul lal.

¹⁵Tulik nutik, kom fin sun lalmwetmet, nga ac arulana insewowo.

¹⁶Nga ac arulana engan ke nga lohng kom fahk kas lalmwetmet.

¹⁷Nimet sok sin mwet koluk, a kom in akfulatye LEUM GOD pacl nukewa.

¹⁸Fin ouinge, kom ac fah sun finsrak nukewa lom.

¹⁹Tulik nutik, porongeyu. Kom in lalmwetmet ac nunak akloalya ke ouiyen moul lom.

²⁰Nimet kupasr nu sin mwet nim wain yokla ac kainmongo.

²¹Mwet lungse nimnim ac mwet kainmongo elos ac sukasrup. Fin pwayena ma kom oru pa mongo ac motul, ac tia paht na kom nukum nuknuk mihsasa.

²²Porongo papa tomom — funu tia el, kom lukun wangin. Ke pacl se nina kiom el matuoh, akkalemye srui lom nu sel.

²³Pwaye, lalmwetmet, lutlut, ac etauk — ma inge kewa fal kom in moli, tusruktu kom in tia kukakunla, mweyen ma inge arulana saok.

²⁴Mwe insewowo nu sin sie papa tulik natul fin lalmwetmet ac moul suwohs.

²⁵Oru ma ac akinsewowoye papa tomom ac nina kiom. Kom fin oru ouinge, nina kiom el ac arulana engan.

²⁶Wen nutik, lohang akwoya, ac lela moul luk in mwe srikasrak nu sum.

²⁷Mutan kosro su eis molin kosro lalos, ac mutan koluk uh, elos sie kwasrip nu ke misa.

²⁸Elos soanekom oana mwet pisrapasr, ac oru mukul puspis in tia pwaye nu sin mutan kialos.

²⁹Su oasr ongoiya yoro? Su oasr asor yoro? Su amei ac lungse anwuk finne wangin sripa? Su srusrala atronmuta?

³⁰Elos su muta paht ke wain uh, ac elos su kar mwe nim ku.

³¹Nimet lela wain uh in srifekomla, finne srusra ac saromrom in cup uh, ac arulana wo emah ke kom ac ukumya uh.

³²Ke lotutang tok ah, kom ac pula mu oana soko wet pwasin el ngaliskomi.

³³Motom ac liye ma sakirik, ac nunak lom ac kaskas lom ac fah tia kalem.

³⁴Kom ac pula mu kom kalkal meoa — ikwot ikme oana ke kom muta elucng ke kwesu in oak uh.

³⁵Na kom ac fahk, “Oasr mwet puokyu, nga tia pula. Oasr mwet uniyu tuh nga tiana esam. Efu ku nga kofla in tukakek? Nga enenu sie pac mwe nim ah.”