Soakas 1:11-33

¹¹Elos fin fahk, “Fahsru kut som kasriki sie mwet ah, ku kutu mwet wangin mwata, ac uniya mwe na pwar.

¹²Sahp pacl se kut ac sonolos elos ac moul na fokoko, tusruktu pacl se kut tari selos elos ac misa!

¹³Kut ac konauk mwe kasrup pus ac nwakla lohm sesr ke ma kut pisrala.

¹⁴Fahsru wi kut. Kut ac kitalik ma nukewa in oana sie nu sesr kewa.”

¹⁵Tulik nutik, nimet wi mwet ouinge uh. Fahla lukelos.

¹⁶Elos rarala in oru ma koluk. Elos akola pacl nukewa in akmas.

¹⁷Tia wo in akoo sie sruhf, ke won se ma kom ke sruokya uh el tu na liye,

¹⁸mweyen mwet oru ouinge uh sifacna akoo mwe kwasrip nu selos, sie mwe kwasrip ma elos ac misa kac.

¹⁹Pacl nukewa, pisrapasr uh ac eisla moul lun mwet rapku — pa inge ma ac sikyak nu sin kutena mwet su moulkin moul sulallal.

²⁰Porongo! Lalmwetmet el pang inkanek uh ac in iwen kuka uh.

²¹El wowoyak ke mutunoa in siti uh, ac in acn nukewa mwet uh tukeni we:

²²“Mwet lalfon, kowos ac lungse in lalfon putaka? Kowos ac pwarkin in aksruksruki etauk uh nwe ngac? Ya kowos ac tiana lutlut in etu mau?

²³Lohng ke pacl nga kai kowos. Nga ac sot kas in kasru wo ac oayapa etauk luk nu suwos.

²⁴Nga tuh pangon kowos ac suli kowos in tuku, a kowos tia lungse lohng. Kowos likinsaiyu.

²⁵Kowos pilesru kas in kasru luk nukewa, ac tia lungse nga in aksuwosye kowos.

²⁶Ouinge ke pacl kowos ac sun ongoiya, nga fah isrun kowos. Nga ac fah aksruksruki kowos ke pacl mwe aksangeng uh sikyak —

²⁷pacl se ac tuku nu fowos oana paka, ac use mwe ongoiya oana sie eng na upa, ac kowos muta in keok ac waiok.

²⁸Na kowos ac fah pang nu ke lalmwetmet, tuh nga ac tia topuk. Kowos ac sukyu yen nukewa, tuh kowos ac tia ku in koneyuyak.

²⁹Wanginna pacl kowos lohang nu ke etauk, ac pacl nukewa kowos srunga akos LEUM GOD.

³⁰Kowos tiana lungse eis kas in kasru luk, ku porongo pacl nga aksuwosye kowos uh.

³¹Ke ma inge, kowos ac fah kosrani fal nu ke orekma lowos, ac pwapa koluk lowos ac tingilkowosi ac pwanang kowos maskin.

³²Mwet selalkung uh misa ke sripen elos pilesru lalmwetmet. Mwet lalfon uh kunausyukla ke nunak in aksrikyaten lalos.

³³Tusruktu, kutena mwet su lohngyu fah muta in misla. Moul lal ac fah wo, ac el ac fah tia enenu in sangeng ke kutena ma.”