Soakas 15:7-28

⁷Mwet lalmwetmet akyokye etauk, a mwet lalfon elos tia.

⁸LEUM GOD El insewowo ke pre lun mwet wo, a El srunga mwe kisa lun mwet koluk.

⁹LEUM GOD El srunga inkanek lun mwet koluk, a El lungse elos su oru ma suwohs.

¹⁰Kom fin oru ma koluk, kom ac sun kaiyuk upa; kom ac misa kom fin tia lela in aksuwosyeyuk kom.

¹¹LEUM GOD El fin ku in etu ma nukewa ma oan in facl lun mwet misa, na kalem lah sie mwet el tia ku in okanla nunak lal liki God.

¹²Mwet inse fulat tia lungse in aksuwosyeyuk elos; elos tiana suk kas in kasru sin mwet lalmwetmet.

¹³Ke pacl mwet uh engan, elos israsr srisrik, a ke pacl elos asor, insialos toasrlana.

¹⁴Mwet lalkung lungse na lutlut, a mwet sulalkung mansisna in nikin.

¹⁵Mwet sukasrup elos moul in fosrnga pacl nukewa, a mwet ma insewowo, elos moul in engan pacl nukewa.

¹⁶Wo in sukasrup ac in sangeng sin LEUM GOD, liki na in kasrup ac moul in lokoalok.

¹⁷Ac wo in mongo mahsrik yen oasr lungse we, liki na in mongo ikwa yuyu yen oasr srunga we.

¹⁸Mwet mongsa elos purakak akukuin, a mwet mongfisrasr elos akmisye.

¹⁹Kom fin alsrangesr, kom ac sun ma upa yen nukewa, a kom fin suwohs, wangin mwe lokoalok ac sun kom.

²⁰Sie tulik lalmwetmet el akenganye papa tumal. Sie tulik lalfon el pilesru nina kial.

²¹Mwet lalfon elos engankin orekma lalfon lalos, a mwet lalmwetmet elos ac oru ma suwohs.

²²Kutena pwapa ma srihk kas in kasru nu kac, ac tia ku in fahla wo; enenu in oasr kas in kasru sin mwet pus, na ac fah wo saflaiya.

²³Mwe engan na yohk in konauk kas fal nu ke sripa se lun pacl sac!

²⁴Mwet lalmwetmet elos fahsr ke inkanek ma utyak nu ke moul; tia ke inkanek ma oatula nu ke misa.

²⁵LEUM GOD El ac fah kunausla lohm sin mwet filang, a El fah loangela acn sin katinmas.

²⁶LEUM GOD El srunga nunak koluk, a El insewowo ke kas kulang.

²⁷Kom fin oru ma laesla ke inkanek kutasrik, kom ac pwanma ongoiya nu fin sou lom. Nimet eis mol in eyeinse, na moul lom fah loes.

²⁸Mwet wo elos nunku meet liki elos topuk. Mwet koluk elos sa in topuk, a kwana orala tukulkul.