Soakas 15:1-14

¹Sie top fisrasr akmisyela kasrkusrak, a sie kas toasr ac purakak kasrkusrak.

²Ke mwet lalmwetmet elos kaskas, mwet uh mwel etauk. A mwet lalfon elos filakunla kas lusrongten.

³LEUM GOD El liye ma orek in acn nukewa; El suiya ma nukewa kut oru — finne wo ku koluk.

⁴Kas kulang mwe akkeye kom, a kas toasr ac mwe akmunasye kom.

⁵Ma lalfon se pa in pilesru kas in luti lun papa tomom; a lalmwetmet pa in porongo kas in kai lal.

⁶Mwet suwoswos elos karinganang kasrpalos, a mwet koluk elos sununtei kasrpalos, na ke pacl koluk tuku, elos kwacola.

⁷Mwet lalmwetmet akyokye etauk, a mwet lalfon elos tia.

⁸LEUM GOD El insewowo ke pre lun mwet wo, a El srunga mwe kisa lun mwet koluk.

⁹LEUM GOD El srunga inkanek lun mwet koluk, a El lungse elos su oru ma suwohs.

¹⁰Kom fin oru ma koluk, kom ac sun kaiyuk upa; kom ac misa kom fin tia lela in aksuwosyeyuk kom.

¹¹LEUM GOD El fin ku in etu ma nukewa ma oan in facl lun mwet misa, na kalem lah sie mwet el tia ku in okanla nunak lal liki God.

¹²Mwet inse fulat tia lungse in aksuwosyeyuk elos; elos tiana suk kas in kasru sin mwet lalmwetmet.

¹³Ke pacl mwet uh engan, elos israsr srisrik, a ke pacl elos asor, insialos toasrlana.

¹⁴Mwet lalkung lungse na lutlut, a mwet sulalkung mansisna in nikin.