Slg 2:11-32

¹¹Mamu gwal ta haɗika Kret nda Arabi. Zivra la Yahuda sanlaha. Dina la Yahuda ta nanaftá sanlaha. Nda inda tsa gwaɗaha mu kavghakavgha ya ta sna mu ta skwi ta mnə həŋ ta ghəŋa glakwa slna Lazglafta ta magata,» ka həŋ.

¹²Ka ndərmim həŋ katakata, snəgla a həŋ ta skwi ŋa magay wa. «Nu mndəra nana ma skwi manda na na?» ka həŋ mataba taŋ.

¹³«Nda ghuya həŋ,» ka sanlaha ka ghuɓasa həŋ.

¹⁴Ka sliʼaftá Piyer kawadaga nda tsa gwal ghwaŋpɗə ndeŋ ya, ka klaŋtá tsi ta lwi. Kaʼa nda həŋ mantsa: «Kaghuni la Yahuda, nda inda kaghuni ta nzakway ma Ursalima! Fawa sləməŋ ka sna skwi dzaʼa mnaghunata yu, ka sna kuni ɗina ta skwi ta magaku.

¹⁵Na mnduha na ná, ghuya a həŋ manda tsa ta grə kuni ya wu, kabga ta ka vzlazlaŋ vli.

¹⁶Gwaɗa anabi Yuwel ta mnata ya kay nana ta magaku ndanana: Wya kaʼa mnata:

¹⁷“Ma kɗavakta fitik ná, wya skwi dzaʼa magaku, ka Lazglafta: Dzaʼa pghadapgha yu ta Sulkuma ɗa ta ghəŋa inda mnda səla, ŋa nuta zwana zgwana ghuni nda kwagha ghuni ka anabiha. Ka mazəmzəm dzaʼa gwaɗa yu ta gwaɗa ŋa duhwalha ghuni. Nda ma suni dzaʼa gwaɗa yu ta gwaɗa ŋa la halata mnduha ghuni.

¹⁸Mantsa ya nzakwani, dzaʼa pghadapgha yu ta Sulkuma ɗa ta ghəŋa kwalvaha ɗa ka zgwana nda la ka miʼaha tani. Ma tsa fitik ya, dzaʼa nzakway həŋ ka la anabi.

¹⁹Dzaʼa magay yu ta skwa mandərmimi ma ghuvaŋata luwa, nda ŋizla mazəmzəmha ta haɗik. Dzaʼa mamu us, dzaʼa mamu vu nda ɗukwakwa ɗiŋ,

²⁰tɗik dzaʼa mbəɗavafta fitik. Ma kɗaku fitik dagala ta nzakway ka fitika Mgham Yesu ka sagha, ghəw manda us dzaʼa mbəɗavafta tili.

²¹Mantsa tama, inda mndu ta hga hga Mgham Yesu nda fatá ghəŋ tida ná, dzaʼa mbaku,”» kaʼa.

²²«Mnduha la Israʼila, snawa ta skwi dzaʼa mnaghunata yu: Yesu mnda la Nazaret na tsa mndu maraghunaŋ Lazglafta ta ga Mghamani, ma magayni ta mandərmimi, nda ŋizla mazəmzəmha kavghakavgha mataba ghuni, manda va ya snaŋ vərɗa kaghuni ya.

²³Vlaghunavla lu ta tsa mndu ya ma dzva ghuni. Nda sna Lazglafta manda va tsaya dzaʼa nzakwa tsi kəʼa, ta kuratá tsi. Ka zləŋaftá kuni ta Yesu. Ma zləŋafta ghuni nda ma dzva gwal kul zləŋa Lazglafta.

²⁴Ka sliʼaganaptá Lazglafta, ka kligiŋta ma ghuya ɗaŋwa mtaku, kabga haɗ mbrakwa mtaku ŋa ŋanata wa.

²⁵Wya ka Dawuda mnuta ta ghəŋani: “Ta nghay yu ta Mgham inda fitik ta kəma ɗa, ta nzaku nda ga zeghwa ɗa.

²⁶Tsaya ta ghunanaftá ŋuɗufa ɗa, kəl yu ka fa laha rfu. Dər má nda nza yu ka mndu dzaʼa mtaku ná, dzaʼa mbiʼay yu ta vgha nda fatá ghəŋ,

²⁷kabga zlanata a ka ta hafa ɗa ma vla gwal nda rwa wu, zlaŋta a ka ta iʼi ta nzakway ka ŋərma mnda gha ŋa rwuta ma kulu wu,

²⁸kagha ta marihatá tva hafu. Dzaʼa ndəghiɗifndəgha ka nda rfu ma nzakwa gha tavata iʼi”» kəʼa, kaʼa.

²⁹Ka Piyer sganaghata mantsa: «Zwanama ɗa, mutsafmutsa yu ta na fitik na ŋa mnaghunata tsiɗiɗ ta gwaɗa ta dzidza mu Dawuda. Tsatsi ná, mtumta ka paɗamta lu. Ta tekeʼa kulani dər gitana.

³⁰Tsatsi ná, anabi ya. Nda sna guli kazlay: Dzrafdzra Lazglafta ta wi nda tsatsi nda waɗanata kazlay: Dzaʼa fafa ta sana mndu mataba zivrani ta palaka ga mgham manda nzakwa tsatsi ya kəʼa.

³¹«Ka tsatsaftá Dawuda ta skwi dzaʼa magaku. Tsaya kəl tsi ka mna gwaɗa ta ghəŋa sliʼagapta Kristi kazlay: Zlana a lu ma vla nzakwa gwal nda rwa wu, rwu a sluʼuvghani ma kulu wu kəʼa ya.

³²«Tsa Yesu gwaɗə yu ya ná, Lazglafta ta sliʼaganapta ma mtaku. Nda nza aŋni demdem ka masləmtsəkani.