SKUTKI 7:25-52

²⁵Ov peske gondoľinelas, hoj leskere phrala achaľona, hoj o Del len kamel te zachraňinel prekal leskero vast, ale on oleske na achaľile.

²⁶Paľis pre aver džives, sar pes duj džene vesekedinenas, sikaďa pes lenge a kamľa maškar lende te anel o smirom. Phenďa: ‘Muršale! Phrala san, soske tumen maren?’

²⁷Ale oda, ko dukhavelas le phrales, les ispidňa a phenďa: ‘Ko tut thoďa upral amende, hoj amen tu te ľidžas a te sudzines?

²⁸So? Kames man te murdarel, sar murdarďal idž kole Egipťanos?’

²⁹Vaš oda lav o Mojžiš denašľa a bešelas andre Midijaniko phuv sar cudzincos, kaj leske uľile duj muršora.

³⁰Sar pregeľa saranda (40) berš, sikaďa pes leske o aňjelos le Rajeskero pre pušťa paš o verchos Sinaj andro krakos, so labolas.

³¹Sar oda dikhľa o Mojžiš, čudaľinelas pes oleske, so dikhel. Ale sar geľa pašeder, hoj te dikhel feder, prevakerďa ke leste o hangos (hlasos) le Rajeskero:

³²‘Me som o Del tire dadengero, o Del le Abrahamoskero, o Del le Izakoskero a o Del le Jakoboskero.’ O Mojžiš avke predaranďiľa, hoj izdralas a daralas pre oda buter te dikhel.

³³O Raj leske phenďa: ‘Čhiv tele o kamašľi pal o pindre, bo odi phuv, pre savi ačhes, hiňi sentno.

³⁴Dikhľom – he mištes dikhľom – sar mire nipi cerpinen andro Egipt a šunďom, sar lenge hin phares. Vašoda avľom tele, hoj len te zachraňinav. Avke akana av a bičhavava tut andro Egipt.’

³⁵O Mojžiš hin oda, saves na kamle. Phende pre leste: ‘Ko tut thoďa upral amende, hoj amen tu te ľidžas a te sudzines?’ A ipen les bičhaďa o Del, hoj len te ľidžal a te zachraňinel akor, sar ke leste prevakerďa o aňjelos, savo pes leske sikaďa andro krakos.

³⁶O Mojžiš len iľa odarik avri a kerelas paš oda zazraki the ďivi andro Egipt, paš o Lolo Moros a mek saranda (40) berš pre pušťa.

³⁷O Mojžiš hin oda, savo phenďa le Izraeloskere manušenge: ‘O Raj, tumaro Del, tumen dela prorokos avke sar man tumare phralendar.’

³⁸Ov hin oda, ko sas pre pušťa le manušenca andral o Izrael the le aňjeloha, savo ke leste vakerelas pro verchos Sinaj the ke amare dada a ov chudľa o lava le dživipnaskere, hoj len te del amenge.

³⁹Ale amare dada les na kamenas te šunel, odčhide les a visaľile peskere jilenca pale andro Egipt.

⁴⁰Phende le Aronoske: ‘Ker amenge devlen, save džana angle amende, bo na džanas, so pes ačhiľa ole Mojžišoha, savo amen iľa avri andral e Egiptsko phuv.’

⁴¹Kerde peske gurumňora a obetinde la modlake e obeta a radisaľonas oleske, so kerde peskere vastenca.

⁴²Ale o Del lendar visaľiľa a diňa len, hoj te lašaren o čercheňa andral o ňebos, avke sar hin pisimen andre le prorokengero zvitkos: ‘Kher le Izraeloskero, anďan mange obeti the dari pre pušťa tel o saranda (40) berš?

⁴³Iľan a ľidžanas le Molochoskero stanos the e čercheň tumare devleskeri le Refanoskeri; o modli, so tumenge kerďan, hoj angle lende te banďon. Vašoda lava tumen het a prethovava tumen dži pal o Babilon.’

⁴⁴Amare daden sas pre pušťa o Sentno Stanos. Oda Stanos sas kerdo avke, sar o Del le Mojžišoske phenďa the sar oda dikhľa.

⁴⁵Oda Sentno Stanos preile amare dada a le Jozuaha les doande andre phuv, so sas le pohanengeri. Le pohanen tradňa o Del het amare dadendar a o Sentno Stanos ode ačhiľa dži andre Davidoskere dživesa.

⁴⁶O Del rado dikhelas le David a o David mangelas le Jakoboskere Devles, či šaj leske ačhavel kher,

⁴⁷ale o Šalamun ačhaďa le Devleske kher.

⁴⁸Ale o Nekbareder na bešel andro khera, so hine kerde le manušendar, avke sar phenel o prorokos:

⁴⁹‘O ňebos hin miro tronos, phenel o Del, a e phuv hiňi tel mire pindre. Savo kher mange ačhavena? Vaj kaj hin varesavo than, kaj mange me šaj odpočovinav?

⁵⁰Či oda savoro na kerďa miro vast?’

⁵¹Tumen manušale! San zacate a tumare jile hine zaphandle. Na šunen pre tumare kana! Furt džan pro Sentno Duchos, avke sar the tumare dada!

⁵²Pre savo prorokos na džanas tumare dada? A murdarenas olen, save imar anglal phenenas, hoj avela o Čačipnaskero. Les tumen akana diňan andre a the murdarďan.