SKUTKI 2:6-43

⁶Sar šunde ola hangi, sar o apoštola vakeren andro lengere čhiba, sa pes ode zgele a našťi avenas ke peste.

⁷Sa pes čudaľinenas a phenenas jekh avreske: “Či nane savore kala, save kade vakeren, andral e Galileja?

⁸Sar oda, hoj len šunas te vakerel sako andre peskere čhiba, andre save avri bariľam?

⁹Šunas len amen: O Parti, o Medi, o Elamiti, ola, save bešas andre Mezopotamija, andre Judsko the andre Kapadokija, andro Pontus the andre Azija,

¹⁰andre Frigija the andre Pamfilija, andro Egipt the andre phuv Libija paš o Cirenija, the ola, save hine andral o Rim,

¹¹o Židi the ola, save pregele andro Židoviko pačaben, o Kreťana the o Arabi – savore šunas len te vakerel andre amare čhiba bare veci le Devleskere!”

¹²Igen pes čudaľinenas a našťi ke peste avenas, phenenas jekh avreske: “So hin kada?”

¹³Ale varesave lendar asanas a phenenas: “Pile guľi mol!”

¹⁴O Peter ušťiľa jekhetane le dešujekh (11) apoštolenca a zorale hangoha ke lende prevakerďa: “Muršale, save san Židi the tumen, save bešen andro Jeruzalem! Šunen mištes mire lava a achaľon kaleske!

¹⁵Kala nane mate, sar tumenge tumen gondoľinen. Se mekča hin eňa ori tosara.

¹⁶Ale kada hin oda, so sas phendo prekal o prorokos Joel:

¹⁷‘Andre ola posledna dživesa ela avke, phenel o Del, hoj čhivava avri mire Duchostar pre dojekh ťelos a tumare čhave the tumare čhaja prorokinena, tumare terne nipi dikhena viďeňja a tumare phure manuša džana sune.

¹⁸He, mek the pre mire služobňika the pro služobňički čhivava avri mire Duchostar a prorokinena.

¹⁹Dava, hoj te dikhen zazraki upre pro ňebos the znameňja tele pre phuv, o rat e jag the baro thuv.

²⁰O kham pes čerinela pro kaľipen a o čhon pro rat mek sigeder, sar avela oda baro the slavno džives le Rajeskero.

²¹A ela avke, hoj sako, ko lašarela le Rajeskero nav, ela zachraňimen.’

²²Muršale andral o Izrael, šunen kala lava: O Ježiš Nazaretsko, oda murš, savo sas le Devlestar bičhado, sas angle tumende presikado andre bari zor the andro zazraki, so o Del kerelas prekal leste maškar tumende, avke sar the korkore dikhľan.

²³O Del imar anglal diňa pal peskeri voľa the planos, hoj tumen ole muršes te zalen a prekal o vasta le binošnengere te primaren pro kerestos a te murdaren.

²⁴Oles o Del uštaďa andral o meriben a iľa lestar o meribnaskere dukha, se aňi pes na delas, hoj les o meriben te ľikerel andre peskeri zor.

²⁵Bo o David vakerelas pal leste: ‘Dikhavas le Rajes angle mande furt; ov hino paš miro čačo vast, me man na čhalavava.

²⁶Vašoda radisaľiľa miro jilo the miri čhib, hoj mek the miro ťelos ačhela pro užaripen (naďej),

²⁷bo na mukeha miri duša pre oda than, kaj hine o mule, aňi na dela tire sentnoneske, hoj leskero ťelos te kirňol.

²⁸Diňal mange te prindžarel o droma le dživipnaskere a pherareha man radišagoha anglal tute!’

²⁹Muršale, phralale! Šaj tumenge phenav o čačipen pal amaro phuro dad o David: Ov muľa, parunďan les a leskero hrobos hin ke amende dži adadžives.

³⁰Vašoda, hoj sas prorokos, džanelas, bo o Del diňa les andre vera lav, hoj ačhavela pre leskero tronos leskero potomkos.

³¹Angloda imar dikhľa a vakerelas pal o Kristus, hoj ušťela andral o meriben a hoj leskeri duša na ačhiľa pre oda than, kaj hine o mule, aňi leskero ťelos na kirňola.

³²Ipen ole Ježiš o Del uštaďa andral o meriben a amen savore oda dikhľam.

³³O Del les hazdňa upre paš peskero čačo vast a chudľa le Sentne Duchos le Dadestar, avke sar phenďa. Paľis les čhiďa avri pre amende a oda hin, so akana dikhen the šunen.

³⁴Bo o David mek na sas andro ňebos a phenel: ‘O Del phenďa mire Rajeske: Beš tuke pal miri čači (pravo) sera,

³⁵medik tuke na thovava tire ňeprijaťeľen tel o pindre.’

³⁶Mi džanen savore manuša andral o Izrael, hoj o Del ole Ježiš, saves tumen ukrižinďan, kerďa Rajeske the Kristoske.”

³⁷Sar oda šunde, čhalaďa oda lengere jilenca a phende le Peteriske the okle apoštolenge: “So kampel te kerel, phralale?”

³⁸O Peter lenge phenďa: “Keren pokaňje a sako tumendar pes mi del te bolel andro nav Ježiš Kristus, hoj tumenge te el odmukle o bini a chudena le Sentne Duchos sar daros.

³⁹Bo oda, so o Del phenďa, patrinel tumenge the tumare čhavenge the savorenge, save hine dural: Sakoneske, kas vičinela o Raj, amaro Del.”

⁴⁰The mek avre buter lavenca lenge svedčinelas. Vakerelas a phenelas lenge pre goďi: “Zachraňinen tumen andral kada binošno pokoleňje!”

⁴¹Avke ola, save radišagoha priile leskero lav, dine pes te bolel. Andre oda džives pes pridine ke lende vaj trin ezera (3 000) manuša.

⁴²Ola savore calo časos pes sikavenas le apoštolendar a furt pes zdžanas le phralenca. Phagerenas jekhetane o maro a ačhenas pro modľitbi.

⁴³Avľa dar pre savore nipi a o apoštola kerenas but zazraki the znameňja.