SKUTKI 28:5-31

⁵Ale ov razinďa tele le sapes andre jag a na ačhiľa pes leske ňič nalačho.

⁶On užarenas, hoj šuvľola, abo hoj perela jekhvareste tele mulo. Sar imar buter užarenas a dikhle, hoj pes leske ňič nalačho na ačhel, visarde peskere lava a phende, hoj hino del.

⁷Pašal oda than sas maľi le načelňikos ole ostrovoske a leskero nav sas Publius. Priiľas amen a trin džives pašal amende kerelas.

⁸Ačhiľa pes, hoj le Publiuskero dad pašľolas strapimen andre horučka a igen les pretradelas. O Pavol geľa ke leste, modľinďa pes, thoďa pre leste o vasta a sasťarďa les.

⁹Sar pes oda ačhiľa, avenas the aver nasvale manuša pal o ostrovos a sas avrisasťarde.

¹⁰On amenge presikade bari pačiv, a sar imar džahas la loďaha het, dine amen oda, so kampelas pro drom.

¹¹Pal o trin čhon odgeľam het la loďaha andral e Alexandrija, so ačhiľa prekal o jevend pro ostrovos. La loďa sas znakos Dvojički.

¹²Sar doavľam la loďaha andro Sirakus, ačhiľam ode trin džives.

¹³Odarik džahas la loďaha pašal o brehos a doavľam andro Regium. Vašoda, hoj pre aver džives phurdelas lačhi balvaj, dogeľam tel o duj džives andro Puteol.

¹⁴Ode arakhľam le phralen, save amen mangle, hoj ode te ačhas efta dživesa. Avke avľam andro Rim.

¹⁵Sar pes o phrala odarik pal amende došunde, avenas ke amende dži paš o fori Appiuskero pľacos the paš o Trin Taberne. Sar len dikhľa o Pavol, paľikerďa le Devleske, radisaľiľa a sas povzbudzimen.

¹⁶Sar doavľam andro Rim, o veľiťeľis upral o šel oddiňa le bertenošen le nekbareder veľiťeľiske. Ale le Pavloske sas domuklo te bešel avrether jekhe slugaďiha, savo pre leste merkinelas.

¹⁷Ačhiľa pes, hoj pal o trin džives peske o Pavol vičinďa le Židovike vodcen. Sar pes zgele, phenelas lenge: “Muršale, phralale! Choc te na kerďom ňič amare manušen, aňi na džavas pro dadengere tradiciji, the avke man andro Jeruzalem phandle andre a dine andro vasta le Rimanenge.

¹⁸Ale on, sar imar man šunde avri, kamle man te premukel, bo na arakhle pre ma ňič ajso, vaš soske mušinďomas te merel.

¹⁹Ale vaš oda, hoj o Židi oda na kamenas, mušinďom man te mangel anglo Cisaris, ale na kamavas ňič te vakerel pre miro narodos.

²⁰Akana tumen vašoda vičinďom, hoj tumen te dikhav a te vakerav tumenca. Bo vaš oda, pre soste užarel o Izrael, som adadžives phandlo kale lancoha.”

²¹On leske phende: “Amen pal tute na chudľam ňisavo ľil andral e Judsko, aňi na avľa ňiko le phralendar, hoj amenge te del te džanel, abo te phenel vareso nalačho pal tute.

²²Ale kamľamas tutar te šunel, sar gondoľines, bo džanas pal kadi sekta, hoj pre late všadzik džan.”

²³Dine leske te džanel savo džives a avle buter džene ke leste andro kher. Ov lenge vakerelas avri, sikavelas pal o kraľišagos le Devleskero a prevakerelas len pal o Ježiš andral o Mojžišoskero Zakonos the andral o proroka tosarastar dži rači.

²⁴Varesave pačanas oleske, so vakerelas, ale aver na pačanas.

²⁵Vašoda, hoj len na sas jekh gondoľišagos, rozgele pes akor, sar o Pavol phenďa kada lav: “Mištes vakerelas o Sentno Duchos prekal o prorokos Izaiaš amare dadenge:

²⁶‘Dža ke kala nipi a phen: Tumen šunena tumare kanenca, ale na achaľona! Tumen dikhena tumare jakhenca, ale na dikhena!

²⁷Bo kale nipengero jilo ačhiľa baruno, peskere kanenca phares šunen a peskere jakha phandle andre, hoj te na dikhen, le kanenca te na šunen, le jileha te na achaľon a te na visaren pes, hoj len te sasťarav avri.’

²⁸Ta akor džanen, hoj avre narodenge hiňi bičhaďi kadi zachrana le Devleskeri a on la the šunena.”

²⁹Sar oda o Pavol phenďa, o Židi gele het a igen pes maškar peste vesekedinenas.

³⁰O Pavol ačhiľa duj berš andro kher, so peske korkoro iľa. Prilelas savoren, ko ke leste avelas,

³¹a vakerelas pal o kraľišagos le Devleskero a sikavelas pal o Raj Ježiš Kristus phundradones the bi e dar. A ňiko leske andre oda na braňinelas.