Text copied!
CopyCompare
Le Devleskero Lav Andre Romaňi Čhib 2019 - SKUTKI - SKUTKI 15

SKUTKI 15:3-28

Help us?
Click on verse(s) to share them!
3Akor len bičhaďa e khangeri a gele prekal e Fenicija the Samarija. Vakerenas pal oda, hoj the aver narodi pes visarde ko Del a savore phralen sas baro radišagos olestar.
4Sar doavle andro Jeruzalem, priiľa len e khangeri, o apoštola the o phuredera a phenenas lenge avri savoro, so lenca kerďa o Del.
5Ale varesave le Farizejendar, save pačanďile, ušťile a phenenas le manušenge: “Ola manuša, save nane Židi, pes mušinen te občhinel a kampel lenge te prikazinel, hoj te doľikeren le Mojžišoskero Zakonos.”
6Akor pes o apoštola the o phuredera zgele, hoj pal oda te gondoľinen.
7Paloda, sar imar buter vakerenas, ušťiľa o Peter a phenďa lenge: “Phralale! Tumen džanen, hoj o Del man kidňa avri tumendar anglo but časos, hoj mandar te šunen the aver nipi o evaňjelium a te pačan.
8O Del, savo prindžarel o jile, sikaďa, hoj len prilel oleha, hoj len diňa le Sentne Duchos avke sar the amen.
9Ov kerďa lenca avke sar the amenca, sar žužarďa lengere jile le pačabnaha avke sar amare.
10Kamen akana te choľarel le Devles oleha, hoj thoven pre meň le učeňikenge ola phare prikazi, so na birinenas te ľidžal aňi amare dada, aňi amen?
11Na! Amen pačas, hoj prekal o lačhejileskeriben (milosť), so del o Raj o Ježiš Kristus, avaha zachraňimen avke sar the on.”
12Savore ola but manuša preačhile te vakerel akor, sar šunde le Barnabaš the le Pavol te vakerel, save bare ďivi the zazraki kerďa o Del prekal lende maškar o manuša, save nane Židi.
13Sar preačhile te vakerel, phenďa o Jakob: “Phralale, šunen man!
14O Šimon akana vakerelas pal oda, sar peske o Del ešebnovar (peršovar) kidňa avri manušen le Nažidendar, hoj te aven leskere nipi.
15Oleha pasinen the o lava le Prorokengere, sar hin pisimen:
16‘Paľis avava pale a ačhavava o rozpelo kher le Davidoskero. Oda, so hin tele čhido, pale ačhavava a thovava les te ačhel pre peskero than,
17hoj the okla manuša te roden le Rajes: Savore, save nane Židi, saven vičinďom, hoj te aven mire. Avke phenel o Raj, savo kerel kada savoro’.
18Imar čirlastar pes oda džanel.
19Vašoda phenav, hoj na kampel te kerel pharipen le Nažidenge, save pes visarde ko Del,
20ale kampel lenge te pisinel ľil a te phenel andre, hoj te na keren lubipen, te na chan o rat, oda, so hin obetimen le modlenge, aňi o mas le tasade džvirinendar.
21Bo le Mojžišoskero Zakonos pes imar čirla genel sako Šabbat (sombat) andro sinagogi a leskere lava vakeren andre dojekh foros.”
22Akor o apoštola the o phuredera the caľi khangeri peske phende, hoj ela mištes te kidaha avri amendar muršen a bičhavaha len andre Antiochija. Bičhade le Barnabaš the le Pavol a lenca bičhade le Juda, saves vičinen Barsabaš, the le Silas, save sas anglune murša maškar o phrala.
23Pisinde a bičhade lenca kada ľil: “O apoštola, o phuredera the o phrala andral o Jeruzalem pozdravinen le phralen andral o aver narodi andre Antiochija, Sirija the Cilicija.
24Šunďam, hoj varesave džene amendar tumen na den smirom le lavenca a previsarde tumare goďa, bo phenen, hoj tumen te občhinen (obrezinen) a te doľikeren o Zakonos. Ale amen lenge ňič na phenďam,
25vašoda pes savoredžene jekhetane dovakerďam, hoj kidaha avri muršen a bičhavaha len ke tumende le Barnabašiha the le Pavloha. On hine amare phrala, saven kamas,
26murša, save dine peskere dživipena vaš o nav amare Rajeskero le Ježišoskero Kristoskero.
27Vašoda bičhavas le Juda the le Silas, hoj the on korkore tumenge oda te phenen.
28Bo le Sentne Duchoske the amenge pes avke dičholas, hoj te na das tumenge ňisavo pharo prikazis, ča oda, so igen kampel:

Read SKUTKI 15SKUTKI 15
Compare SKUTKI 15:3-28SKUTKI 15:3-28